पाय अचानक एक्सलेटरवर पडला; कार सुस्साट सुटली, तीन रिक्षा, बाईकला धडक; पादचाऱ्यांना उडवलं

मुंबई: घाटकोपरच्या सुधा पार्क परिसरात एका भरधाव कारने तीन रिक्षा टेम्पो आणि दुचाकीला धडक दिली. या घटनेमध्ये एका शाळकरी विद्यार्थ्यांसह सात जण जखमी झाले आहेत. ही घटना सीसीटीव्हीमध्ये रेकॉर्ड झाली आहे.

रिक्षा चालक राजू यादव त्याच्या मित्रासोबत सुधा पार्क परिसरात पार्क केलेल्या कारमध्ये बसला होता. अचानक त्याने कार स्टार्ट केली. त्याचा पाय एक्सलेटरवर गेला. त्यामुळे कार भरधाव वेगात सुसाट निघाली. या भरधाव कारने रस्त्यावरून जात असलेल्या तीन रिक्षा आणि एका दुचाकीला तसंच काही पादचाऱ्यांना धडक दिली. ज्यावेळी ही घटना घडली त्यावेळी काही शाळकरी विद्यार्थीदेखील या परिसरातून जात होते. घटनेमध्ये एक विद्यार्थीही जखमी झाला आहे. या घटनेनंतर स्थानिक रहिवाशांनी जखमींना तातडीनं राजावाडी रुग्णालयामध्ये दाखल केले. कारचालक राजू यादव याला पोलिसांनी अटक केली असून पुढील तपास पंतनगर पोलीस करत आहेत.