म. टा. प्रतिनिधी, मुंबई
करोनाच्या लॉकडाउनच्या काळात सुमारे दोन महिने बंद असलेले महाराष्ट्र प्रदेश काँग्रेसचे दादरचे टिळक भवन हे कार्यालय सोमवारपासून पुन्हा सुरू करण्यात आले आहे. राज्य शासनाच्या नियमानुसार या कार्यालयात १० टक्के कर्मचाऱ्यांची उपस्थिती असेल. या सर्व कर्मचाऱ्यांना योग्य ती काळजी घेण्याच्या तसेच भेटीची वेळ घेऊन आलेल्या अभ्यंगतांनाच प्रवेश देण्याच्या सूचनाही देण्यात आल्याचे काँग्रेसचे प्रदेशाध्यक्ष व महसूलमंत्री बाळासाहेब थोरात यांनी सांगितले.
प्रदेशाध्यक्ष थोरात सोमवारी दादरच्या टिळक भवन या पक्षाच्या कार्यालयात आले होते. यावेळी काँग्रेसचे प्रदेश उपाध्यक्ष सुभाष कानडे, सरचिटणीस राजन भोसले आदी उपस्थित होते. यावेळी थोरात म्हणाले की, दोन महिन्यांचा काळ मोठ्या संकटाचा होता. या काळात सर्वांनी धैर्याने काम केले. लॉकडाउन असल्यामुळे या काळात पक्ष कार्यालय बंद ठेवण्यात आले होते. परंतु पक्षाचे काम ऑनलाइन पद्धतीने सुरूच होते. या गंभीर संकटाच्या काळात काँग्रेस कार्यकर्त्यांनी रस्त्यावर उतरून गरजू लोक, कामगार, गरिबांना मोठ्या प्रमाणात मदत केली. अन्नधान्य, रेशन, औषधे, सॅनिटायझर, मास्कची मोठ्या प्रमाणात मदत करण्यासाठी मेहनत घेतली आहे.