विकृतीचा कहर! रिक्षा चालकाचे महिलेसमोर हस्तमैथुन

मुंबई

महिलांसाठी सुरक्षित समजल्या जाणाऱ्या मुंबईत महिलांना सध्या विकृतांचा सामना करावा लागत आहे. रिक्षातून घरी जाणाऱ्या एका पत्रकार महिलेसमोर चालकाने अश्लील चाळे केले. इतकंच नाही तर त्याने त्यानंतर अर्ध्या रस्त्यात रिक्षा थांबवत या महिलेसमोर आपली पँट काढून हस्तमैथून केल्याचा धक्कादायक प्रकार घडला.

बुधवारी रात्री ही घटना घडली. ही धक्कादायक घटना महिलेने सोशल मीडियावर पोस्ट केली. रात्रीच्या सुमारास मालाड येथून पीडित महिलेने घरी जाण्यासाठी रिक्षा पकडली. त्यानंतर हा रिक्षाचालक अश्लील चाळे करु लागला. त्यानंतर अचानक रस्त्यामध्येच रिक्षा थांबवून चालकाने महिलेसमोर पँट काढून हस्तमैथून करण्यास सुरूवात केली. या प्रकारामुळे धास्तावलेल्या महिलेने रिक्षातून पळ काढला. त्यावेळी जवळच काही जण उभे होते. मात्र, त्यातील एकही जण पुढे आला नसल्याचेही महिलेने सांगितले. ही घटना घडली तेव्हा घर काही मिनिटांच्या अंतरावर असल्याने वाईट प्रसंगातून बचावले असल्याचेही या पीडित महिलेने सांगितले.

सोशल मीडियावरील या घटनेच्या पोस्टनंतर मुंबई पोलिसांनी या पीडित महिलेचा जबाब घेत तक्रार नोंदवून घेतली आहे. या महिलेने दिलेल्या माहितीनुसार रिक्षाचालकाचा शोध घेण्यात येत असल्याची माहिती पोलिसांनी दिली.