'सोनू निगम अरिजितच्या पुढे जाणार नाही'

मटा ऑनलाइन वृत्त । मुंबई

गायक सोनू निगम याला प्रसिद्धीचा हव्यास आहे. अशा व्यक्ती सत्तेत असलेल्यांची खुशामत करण्यासाठी वाट्टेल ती विधाने करतात. पण अशी विधाने करून सोनू निगम अरिजित सिंगच्या पुढे जाऊ शकत नाही, असा टोला राष्ट्रवादी काँग्रेसचे नेते जितेंद्र आव्हाड यांनी लगावला आहे. सोनू निगमच्या कालच्या अजानसंबंधीच्या टि्वटमुळे खळबळ उडाली होती. या वादात आता राजकीय नेत्यांनीही उडी घेतली आहे.

'मी मुस्लिम नाही आणि तरीही मला सकाळी अजानच्या आवाजाने उठावं लागतं. भारतातली ही धार्मिक बळजबरी कधी संपणार,' असे टि्वट करून सोनू निगमने काल वाद ओढवून घेतला. त्यानंतर 'कुठलंही देऊळ किंवा गुरुद्वारा विजेचा वापर करून आपल्या धर्माचं आचरण न करणाऱ्यांना झोपेतून उठवत असेल, असं मला वाटत नाही. मग असं का?... ही तर सरळसरळ गुंडागर्दी आहे', असं ट्विटही सोनू निगमने काल केलं होतं. सोशल मीडियाने दिवसभर सोनू निगमला धारेवर धरलं. त्यानंतर यावर काल जितेंद्र आव्हाड यांनी सोनूवर बोचरी टीका केली.

समाजवादी पक्षाचे नेते अबू आझमी यांनीही या वादात उडी घेतली आहे. 'क्लब आणि मोठ्या कार्यक्रमांमध्ये मोठ्या आवाजात लावलेली गाणी तुम्हाला चालतात, तर अजानच्या आवाजामुळे इतका त्रास का होतो? आणि इतकेच असेल तर कानात कापसाचे बोळे घाला,' असे अबू आझमी यांनी म्हटले आहे.

सोनू मात्र आपल्या विधानावर ठाम होता. मोहम्मद पैगंबरानं इस्लाम बनवला तेव्हा वीज नव्हती, मग एडिसनच्या शोधानंतर हा कोलाहल कशासाठी?, असा सवालही त्यानं आपल्या टि्वटच्या समर्थनार्थ उपस्थित केला.