मुंबईच्या तुरुंगातच दोन महिलांची प्रसूती; तिथेच रंगला नामकरण सोहळा; महिला पोलीस झाल्या आत्या अन् कैदी पाहुणे!

म. टा. खास प्रतिनिधी, मुंबई : मुंबईतील महिला तुरुंगाची सजविण्यात आलेली भिंत... सगळीकडे लावलेले रंगीबेरंगी फुगे, फुलांच्या माळांनी सजविलेली पाळणी... या हृदयस्पर्शी वातावरणाने तुरुंगातील सर्वच कैदी भारावले होते. औचित्य होते ते दोन बाळांच्या नामकरण विधी सोहळ्याचे.

दोन महिला कैद्यांना झालेल्या बाळांचे बारसे मुंबईतील एका तुरुंगात पेढे वाटून करण्यात आले. या अनोख्या सोहळ्याला इतर कैदी आणि कारागृहातील कर्मचारी नातेवाईक आणि पाहुणे बनले होते. मुंबईतील महिला तरुंगात असलेल्या दोन महिला कैदी गर्भवती होत्या. शिक्षा भोगत असतानाच, त्यांच्या पोटी बालकांनी जन्म घेतला. आपल्या मुलांचे बारसे करावे असे त्यांना वाटत होते. मात्र, तुरुंगात ते शक्य नव्हते. अखेर ‘आंगन’ या स्वयंसेवी संस्थेने यासाठी पुढाकार घेतला. तुरुंग विभागाचे उपमहानिरीक्षक योगेश देसाई यांच्या मार्गदर्शनाखाली दोन महिलांच्या मुलांचे नामकरण करण्याचे ठरले. त्यानुसार सजावट करण्यात आली आणि पाळणेही सजविण्यात आले. तुरुंगातल्याच पोलिस मावशांनी पाळणे म्हटले आणि बाळांच्या कानात कुर्र... करून मुलाचे नाव सारांश, तर मुलीचे नाव मायशा ठेवल्याचे सांगितले. नामकरण सोहळ्यास उपस्थित महिला कैदी आणि त्यांच्या मातांना खाऊ आणि साड्यांचे वाटप करण्यात आले. कर्मचारी तसेच महिला कैद्यांनी कुटुंबाप्रमाणे या सोहळ्यात सहभागी होऊन बाळांना आशीर्वाद दिले.