घोटाळेबाजांवर बडगा

मुंबई : रस्ते घोटाळ्यात दोषी ठरलेले आणि सहा महिने तुरुंगाची हवा खाऊन आलेले रस्ते विभागाचे तत्कालीन चीफ इंजिनीअर अशोक पवार व दक्षता विभागाचे तत्कालीन चीफ इंजिनीअर उदय मुरूडकर यांना महापालिकेने कारवाईचा जोरदार दणका दिला आहे. सेवानिवृत्त झालेल्या पवार यांची पेन्शन, भविष्य निर्वाह निधी, पगारी रजा व इतर दावे रोखून ठेवले आहेत, तर मुरुडकर यांना सक्तीची निवृत्ती घेण्याचे फर्मान काढले आहे. लवकरच याबाबतचे प्रस्ताव पालिका सभागृहात मंजूर करण्यात येणार आहेत. दोघांवरही खटले सुरू असताना कारवाईचा बडगा उगारण्यात आला आहे.

पालिकेत दोन वर्षांपूर्वी झालेल्या रस्ते घोटाळ्यात पवार व मुरुडकर यांनी कंत्राटदारांना मदत केल्याचा ठपका ठेवून त्यांना निलंबित करण्यात आले आहे. मुरूडकर यांच्यावर नालेसफाईच्या ३२ कामांमध्ये अनियमितता केल्याचाही दोषारोप ठेवण्यात आला आहे. याप्रकरणी पालिकेने एफआयआर केल्यानंतर या दोघांनाही अटक करण्यात आली. सुमारे सहा महिने तुरुंगाची वारी केल्यानंतर त्यांची जामिनावर सुटका झाली आहे. दोघांवरही न्यायालयात खटले सुरू आहेत.

पवार यांनी वयाची ५८ वर्षे पूर्ण केल्यामुळे यंदाच्या एप्रिलमध्ये ते सेवानिवृत्त झाले आहेत. त्यांना सेवानिवृत्ती देण्याचा प्रस्ताव स्थायी समितीत मंजूर झाला आहे. सेवानिवृत्तीनंतर त्यांची सर्व थकबाकी रोखून ठेवण्याचा निर्णय पालिकेने घेतला आहे. तसेच त्यांना चौकशीदरम्यान देशाबाहेर जाता येणार नाही, असे कायदेशीर प्रतिज्ञापत्र लिहून घेण्यात आले आहे.

दक्षता विभागाचे तत्कालीन चीफ इंजिनिअर मुरूडकर यांनी यंदाच्या २९ जानेवारीला वयाची ५५ वर्षे पूर्ण केली आहेत. त्यांचा घोटाळ्यात सहभाग आढळल्याने यापुढे त्यांना सेवेत न ठेवता सक्तीची सेवानिवृत्ती पत्करण्याची तीन महिन्यांची नोटीस पाठवण्याचा निर्णय पालिकेने घेतला आहे.