‘सामना’वर बंदीची भाजपची मागणी

मुंबई : मतदानाच्या आधीचे दोन दिवस नियमानुसार प्रचार थांबल्यानंतर मतदारांना प्रभावित करणारा मजकूर प्रकाशित करणे किंवा जाहिरात मोहीम हाती घेण्यावर बंदी असतानाही ‘सामना’ या शिवसेनेच्या मुखपत्रातून आचारसंहितेचे उघडपणे उल्लंघन होत असल्याचा आरोप भाजपच्या प्रदेश प्रवक्त्या श्वेता शालिनी यांनी केला आहे. त्यामुळे १६, २० व २१ फेब्रुवारीला ‘सामना’ प्रसिद्ध करण्यावरच बंदी घालावी, अशी मागणी त्यांनी राज्य निवडणूक आयोगाकडे केली आहे.

आयोगाने आखून दिलेल्या नियमांचे ‘सामना’च्या औरंगाबाद आवृत्तीमध्ये उघडपणे उल्लंघन केल्याचा आरोपही त्यांनी केला असून, त्यासाठी ‘सामना’ आणि त्याच्या संपादकांवर कारवाई करावी, अशी मागणीही त्यांनी केली आहे.