म. टा. विशेष प्रतिनिधी, मुंबई
नायगावमधील बीडीडी चाळींच्या पुनर्विकास प्रकल्पातील सॅम्पल फ्लॅट म्हाडाने तयार केला आहे. ५०० स्क्वेअर फुटांचा टूबीएचके फ्लॅट, आतमध्ये गुळगुळीत लाद्या, अलगदपणे सरकणाऱ्या स्लायडिंग विंडो, आकर्षक टॉयलेट-बाथरूम असे हे स्वप्नवत घर बीडीडी चाळीतील रहिवाशांना मोफत मिळणार आहे. अर्थात, सॅम्पल फ्लॅटमध्ये दिलेल्या आश्वासनांप्रमाणे पुनर्विकास झाल्यास बाजाराभावाप्रमाणे या फ्लॅटची किंमत किमान अडीच कोटी रुपये होईल. परिणामी हा प्रकल्प पूर्ण झाल्यावर नायगावमधील खासगी विकासकांच्या घरांचे दर उतरण्याची शक्यता आहे.
नायगावमध्ये सुमारे ४२ बीडीडी चाळी आहेत. यांमध्ये तीन हजार २८९ घरे आहेत. पुनर्विकासानंतर इथे २२ ते २४ मजल्यांच्या किमान आठ इमारती होतील. सध्या १६० स्क्वेअर फुटांच्या जागेत राहणाऱ्या मूळ रहिवाशांना यांमध्ये ५०० स्क्वेअर फुटांचे घर मिळणार आहे. मात्र रहिवाशांच्या मनात प्रकल्पाबद्दल संभ्रम असून, तो दूर करण्यासाठी म्हाडाने नायगावच्या ललित कला भवनजवळ सॅम्पल फ्लॅट तयार केला आहे. हा आकर्षक फ्लॅट बघण्यासाठी नायगावमधील चाळकऱ्यांची गर्दी होऊ लागली आहे.
चेहरामोहरा बदलेल
सात वर्षांत हा प्रकल्प पूर्ण करण्याची योजना आहे. पुनर्विकासानंतर नायगावचा संपूर्ण चेहरामोहरा बदलेल, अशी चर्चा आहे. कुटुंब वाढल्याने काही रहिवाशांनी ही घरे विकल्यास खासगी विकासकांना मोठी स्पर्धा निर्माण होण्याची शक्यता आहे. ना. म. जोशी मार्गावरील बीडीडी चाळींचा पुनर्विकासही होत असून, सॅम्पल फ्लॅट तयार होत आहे.
सॅम्पल फ्लॅटप्रमाणेच नवीन घर देण्याची म्हाडाने पूर्तता करावी. कुटुंब वाढल्यामुळे सध्या चाळीतील पोटमाळा, व्हरांडा, गच्चीतही चाळकरी झोपतात. चाळीत भरपूर मोकळी जागा असल्याने मोठी कुटुंबे एकत्र राहतात. पुनर्विकासानंतर या फ्लॅटमध्ये मोठे कुटुंब समावणे कठीण होईल. त्यामुळे ५०० स्क्वेअर फुटांपेक्षा मोठी जागा रहिवाशांना द्यावी.
- अजय मोहिते, नायगाव बीडीडी चाळीतील रहिवासी
पुनर्विकास प्रकल्प
नायगाव बीडीडी चाळ पुनर्विकास प्रकल्पाची किंमत : २८०० कोटी रु.
ना. म. जोशी मार्ग बीडीडी चाळ प्रकल्पाची किंमत : २४०० कोटी रु.
प्रकल्प पूर्ण होण्याचा कालावधी : सात वर्षे