आंदोलनाचा फुगा फुटला; बेस्ट वाहतूक सुरळीत

मुंबई: बेस्ट कामगारांना आरोग्य विमा कवच देण्यासह इतर मागण्यांसाठी बेस्ट संयुक्त कामगार कृती समितीने पुकारलेल्या आंदोलनाचा फज्जा उडाला आहे. करोना संकटाच्या काळात बेस्ट कामगारांनी कामगार संघटनेला साथ देण्याऐवजी बेस्ट प्रशासनाला साथ दिली. ८० ते ९० टक्के कामगारांनी कामावर हजेरी लावल्याने बेस्टची वाहतूक सुरळीत सुरू होती. शिवाय कामगार कामावर हजर झाल्याने बेस्टला पर्यायी व्यवस्थेची अंमलबजावणी करण्याची गरज पडली नाही.

बेस्ट कामगारांना विमा कवच देण्याबरोबरच इतर मागण्यांसाठी शशांक राव यांच्या नेतृत्वाखालील बेस्ट संयुक्त कामगार कृती कर्मचारी समितीने आज आंदोलनाची हाक दिली होती. त्यामुळे करोना संकटाच्या काळात या आंदोलनाचा अत्यावश्यक सेवेतील कामगारांना मोठा फटका बसण्याची चिन्हे दिसत होती. त्यामुळे बेस्ट प्रशासनानेही पर्यायी व्यवस्था म्हणून एसटीकडून १ हजार बसेस चालवण्याची पर्यायी व्यवस्था केली होती. मात्र, आज १८०० बसेस नेहमीप्रमाणेच रस्त्यावरून धावले. कामगार कामावर आले. त्यामुळे कोणतीही अडचण उद्भवली नसल्याचं बेस्ट प्रशासनाने स्पष्ट केलं.

बीडमध्ये करोनाचा पहिला बळी; औरंगाबादेत मृतांची संख्या ३२ वर

आज सकाळपासूनच बेस्टचे सर्व कर्मचारी कामावर उपस्थित होते. कल्याण, बदलापूर, पनवेल, वसई, विरार आणि पालघरपर्यंत बेस्टच्या बसेस धावल्या. सर्व आगारात आवश्यकतेपेक्षा अधिक वाहक, चालक, मॅकेनिक आणि इतर कामगार उपस्थित होते. त्यामुळे शशांक राव यांच्या आंदोलनाचा फुगा फुटला आहे, अशी टीका बेस्ट कामगार सेनेचे कार्याध्यक्ष अॅड. उदयकुमार आंबोणकर यांनी केली आहे.


लॉकडाऊन ४: पहिल्याच दिवशी रुग्णसंख्येत रेकॉर्डब्रेक वाढ