कपड्यांच्या दुकानात सट्टा; चौघांना अटक

म. टा. खास प्रतिनिधी, मुंबई

कपड्यांच्या दुकानात क्रिकेट सामन्यांवर सट्टा घेणाऱ्या टोळीचा गुन्हे शाखेच्या पथकाने शनिवारी पर्दाफाश केला. दादर येथे कारवाई करीत पोलिसांनी चौघांना अटक केली असून, त्यांच्याकडून सट्टा लावण्यासाठी वापरले जाणारे साहित्य हस्तगत करण्यात आले आहे.

ऑस्ट्रेलियामध्ये सुरू असलेल्या बिग बॅश प्रीमियम क्रिक्रेट सामन्यांवर दादर येथील भवानी प्लाझा शॉपिंग सेंटरमधून सट्टा लावला जात असल्याची माहिती गुन्हे शाखा युनिट-२च्या पथकाला मिळाली. प्रभारी पोलिस निरीक्षक संजय निकुंबे यांच्या मार्गदर्शनाखाली पथकाने याठिकाणी छापा मारला. त्यावेळी कपड्यांच्या एका दुकानात चौघे मोबाइल आणि लॅपटॉपचा वापर करून सट्टा घेत असताना आढळले. पोलिसांनी विपूल मोरबिया, जिमीत पारीख, सतीश मेहता व विमल मोरबिया यांना अटक केली. त्यांच्याकडून सहा मोबाइल, दोन लॅपटॉप, टीव्ही, राऊटर आणि काही रोख रक्कम असा सुमारे दोन लाखांचा मुद्देमाल हस्तगत करण्यात आला आहे.

लॅपटॉप आणि मोबाइलची पडताळणी केली असता, या चौघांनी बेकायदा सुमारे पाच लाखांचा सट्टा घेतला असल्याचे उघडकीस आले. अधिक चौकशीत यांच्याकडील मोबाइलमध्ये सापडलेली सीमकार्ड इतरांच्या नावाने असून, ती बनावट कागदपत्रांवर तयार करण्यात आल्याचे स्पष्ट झाले आहे. अटक करण्यात आलेल्या चौघांवर जुगार प्रतिबंधक कायदा आणि इतर कलमान्वये गुन्हा दाखल करण्यात आला आहे. चारही आरोपींना न्यायालयाने ३१ डिसेंबरपर्यंत पोलिस कोठडी सुनावली आहे.