करोनावरील खात्रीशीर औषधांचा दावा
म. टा. खास प्रतिनिधी, मुंबई
महाजाल विश्वातील 'डार्कनेट'मध्ये करोना उपचारावरील खात्रीशीर उपायांचे दावे करणाऱ्या बोगस वेबसाइटची संख्या वाढली आहे. नियमित इंटरनेट वापरापेक्षा अत्यंत गुंतागुंतीच्या आणि सायबर गुन्ह्यांचा वावर असलेल्या डार्कनेटमध्ये चंचूप्रवेश केलेल्या या वेबसाइटचा शोध घेण्याचे कामही सुरू झाले आहे.
ऑनलाइन फसवणुकीच्या वेगवेगळ्या पद्धती समोर येत आहेत. त्यात डार्कनेटवर करोनासाठी प्लाझ्मा थेरपीसाठी रक्ताचा पुरवठा करण्याचा दावा करणाऱ्या वेबसाइटचाही समावेश होत आहे. जगभरात करोनाने थैमान मांडले असतानाच त्यावर उपायांसाठी निरनिराळ्या पद्धती अवलंबल्या जात आहे. करोनावर खात्रीशीर लसी शोधण्याचे काम सुरू आहे. त्या जोडीला अनेक पॅथींच्या औषधांचा योग्य परिणाम होत असल्याचेही दावे-प्रतिदावे केले जात आहे. त्यात करोनावर यशस्वी मात केलेल्यांच्या रक्ताचा वापर प्लाझ्मा थेरपीसाठीही केला जात आहे. नेमक्या त्याचाच गैरफायदा घेत डार्कनेटवरील ठगांनी फसवणुकीचे धंदे सुरू केले आहेत.
डार्कनेटवरील वेबसाइटवर करोनाशी झुंज देणाऱ्यांना प्लाझ्मा थेरपीसाठी रक्तांची आवश्यकता असल्याने ते पुरविण्याचे दावे केले आहेत. त्यात बिटकॉइन व्यवहाराचा पर्याय देण्यात आला असून त्याची भारतीय चलनातील रक्कम प्रति लीटर १० लाख रु. एवढी आहे. डार्कनेटच्या वापरासाठी नियमित सर्चइंजिनचा उपयोग होत नाही. त्यासाठी कमाल क्षमता असलेल्या सर्चइंजिनचा वापर होतो. साधारणपणे नियमित स्वरूपातील इंटरनेटचा वापर हा काही टक्के एवढाच होतो. तर डार्कनेटचा वापर प्रचंड स्वरूपात असल्याचे सांगण्यात येते. डार्कनेटचा वापर केवळ सायबरच नव्हे इतर गुन्ह्यांसाठी केला जातो.
मुंबईत पुरवठ्याचा दावा
प्लाझ्मा थेरपीसाठी इच्छुक असलेल्यांना मुंबईतही त्या रक्ताचा पुरवठा केला जाऊ शकेल, असेही वेबसाइटमध्ये म्हटले जाते. या सर्व घडामोडीत आंतरराष्ट्रीय हस्तकांचाही समावेश असण्याची शक्यता नाकारली जात नाही. या पद्धतीचा वेबसाइटची माहिती महाराष्ट्र सायबर सेलला मिळाली असून त्याचा पुढील तपास केला जात आहे. हे सर्व रॅकेट मोडून काढतानाच त्याच्या सूत्रधारांपर्यंत पोहोचण्याचे प्रयत्न सुरू असल्याचे महाराष्ट्र सायबर सेलचे विशेष पोलिस महानिरीक्षक यशस्वी यादव यांनी सांगितले. कोणत्याही पद्धतीने फसवणूक होऊ नये यासाठी आमचे दल कार्यरत असल्याचेही यादव यांनी स्पष्ट केले.