म. टा. खास प्रतिनिधी, मुंबई
विवाहित बहिणीला त्रास देत असल्याने जाब विचारण्यासाठी गेलेल्या भावाची भावोजीने हत्या केल्याची घटना सोमवारी महालक्ष्मी धोबीघाट येथे घडली. विनोद मोखरा (४०) असे मृत व्यक्तीचे नाव असून आग्रीपाडा पोलिसांनी याप्रकरणी राजेश बोराची (४७) याला अटक केली आहे.
महालक्ष्मी येथे राहणाऱ्या राजेशसोबत विनोद याच्या बहिणीचे काही वर्षांपूर्वी लग्न झाले. राजेशला दारूचे व्यसन होते. नेहमी दारूच्या नशेत असल्यामुळे राजेश याला महापालिकेतील नोकरी गमवावी लागली. यावरून पती-पत्नीमध्ये वारंवार भांडणे होऊ लागली. दारूच्या नशेत राजेश पत्नीला रोज मारहाण करू लागला. रोजच्या कटकटीला कंटाळून तिने दोन्ही भावांकडे राजेशची तक्रार केली. सोमवारी बहिणीला मारहाण केल्याबद्दल विचारणा करण्यासाठी दोघे भाऊ तिच्या घरी गेले. विनोद आणि त्याचा भाऊ गिरीधर या दोघांनी राजेशची समजूत काढण्याचा प्रयत्न केला. मात्र तो काही समजून घेण्याच्या मनःस्थितीत नव्हता. विनोद आणि गिरीधर जाब विचारण्यासाठी आल्याने राजेश संतापला आणि घरातील चाकूने त्याने विनोदवर वार केले. जखमी अवस्थेत त्याला जवळच्या रुग्णालयात नेण्यात आले मात्र दाखल करण्यापूर्वीच त्याचा मृत्यू झाला. घटनेनंतर पळालेल्या राजेशला आग्रीपाडा पोलिसांनी अटक केली.