सुपर बाइकरचा वसईत अपघाती मृत्यू

म. टा. वृत्तसेवा, वसई

भरधाव ट्रेलरने दिलेल्या धडकेत तरुण सुपर बाइक रायडरचा मृत्यू झाल्याची घटना रविवारी सकाळी अहमदाबाद महामार्गावर घडली.

सकाळी ७.१५ वाजण्याच्या सुमारास वसई पूर्व येथील सातीवली पुलावरून वरुण महेश बारमोडी (२८) हा सुपर बाइकर आपल्या बीएमडब्ल्यू जीएस १२०० मॉडेलच्या मोटारसायकलीवरून जात होता. त्याचवेळी त्याला गुजरातकडे जाणाऱ्या भरधाव ट्रेलरने धडक दिली. या अपघातानंतर ट्रेलरचालक पळून गेला. ही धडक एवढी जबरदस्त होती की, त्यातच वरुणचा मृत्यू झाला.

भाईंदर पश्चिमेतील अंजली व्हिला आशीष कॉम्लेक्स येथे राहणारा वरुण सुपर बाइकर म्हणून प्रसिद्ध होता. बाइकवरून मोठा प्रवास करणाऱ्या सुपर बाइकर ग्रुपमध्ये तो सहभागी होत असे. मुंबईहून परराज्यात असे ग्रुप बाइकलवरून प्रवास करतात. काही दिवसांपूर्वीच त्याने नवी बाइक घेतली होती. त्यामुळे त्याला नंबरप्लेटही नव्हती. अपघाताप्रसंगी तो अहमदाबाद महामार्गावरून मनोर येथे जाता होता.

सलग सुट्ट्यांमुळे इतर महामार्गांप्रमाणेच अहमदाबाद महामार्गावरही रविवारी वाहनांची गर्दी होती. त्यामुळे काही ठिकाणी कोंडीही होत होती. अनेक ठिकाणी या कोंडीतून मार्ग काढण्यासाठी रहदारीचे नियम अनेक मोटारचालक धाब्यावर बसवत असल्याचे नेहमीच चित्र दिसते. त्यामुळेही अशा गर्दीच्या वेळी हा महामार्ग धोकादायक बनतो.