मुहूर्त ठरला, सुपारी फुटली आणि नवरीही नटली, हर्षवर्धन पाटलांची लेक होणार ठाकरेंची सून!

मुंबई: भाजपचे नेते हर्षवर्धन पाटील यांची कन्या लवकरच ठाकरे घराण्याची सून होणार आहे. येत्या 28 डिसेंबरला अंकिता पाटील आणि निहार बिंदूमाधव ठाकरे यांचा विवाह होणार आहे. गेल्या अनेक दिवसांपासून हर्षवर्धन पाटील यांच्या कन्येच्या विवाहाची चर्चा होती. मात्र, नवरदेवाचे नाव बराच काळ गुलदस्त्यात होते. अखेर यावरुन पडदा उठला असून अंकिता पाटील आणि निहार ठाकरे विवाहबद्ध होणार असल्याचे स्पष्ट झाले आहे. अंकिता पाटील आणि निहार ठाकरे यांचा विवाह सोहळा 28 डिसेंबरला मुंबईत पार पडणार आहे. मोजक्या लोकांच्या उपस्थितात हा विवाहसोहळा पार पडेल. तर हर्षवर्धन पाटील यांचं मूळ गाव असलेल्या बावडा वासियांसाठी पाटील यांनी 17 डिसेंबरला भोजन सोहळ्याचं आयोजन करण्यात आल्याचे समजते.

अंकिता पाटील या पुणे जिल्हा परिषदेच्या सदस्या आहेत. तर निहार यांचे एलएलएम पर्यंत शिक्षण झाले असून ते पेशाने वकील आहेत. अंकिता यांनी लंडन स्कूल ऑफ इकॉनॉमिक्समध्ये आणि एक वर्ष हार्वर्डमध्येही शिक्षण घेतले आहे. इंडियन शुगर मिल असोसिएशनच्या त्या सदस्या आहेत. हार्वर्ड विद्यापीठात शिक्षण घेत असताना अंकिता आणि निहार यांची ओळख झाली होती. नंतरच्या काळात अंकिता पाटील यांनी दोन वर्षांपूर्वी आपल्या वडिलांच्या पावलावर पाऊल ठेवत राजकारणात प्रवेश केला होता. बावडा-लाखेवाडी जिल्हा परिषद गटाच्या 2019 साली झालेल्या निवडणुकीत अंकिता पाटील विजयी झाल्या होत्या. ही निवडणूक विक्रमी मताधिक्याने जिंकल्यामुळे अंकिता पाटील चर्चेत आल्या होत्या. हर्षवर्धन पाटील यांनी भाजपमध्ये प्रवेश केला असला तरी अंकिता पाटील अद्याप काँग्रेसमध्येच आहेत.

तर निहार हे शिवसेनाप्रमुख बाळासाहेब ठाकरे यांचे नातू आहेत. त्यांचे वडील बिंदूमाधव यांचे 1996 मध्ये अपघाती निधन झाले होते. मुख्यमंत्री उद्धव ठाकरे व त्यांचे बंधू जयदेव हे निहार यांचे सख्खे काका तर राज हे चुलतकाका आहेत. या विवाहाच्या निमित्ताने ठाकरे आणि पाटील अशी दोन राजकीय घराणी एकत्र येणार आहेत.

हर्षवर्धन पाटील हे मंगळवारी राजकीय नेत्यांना विवाहसोहळ्याचे निमंत्रण देण्यासाठी मुंबईत आले होते. यावेळी त्यांनी राज ठाकरे यांचे निवासस्थान असलेल्या शिवतीर्थावर जाऊन त्यांना विवाहसोहळ्याचे निमंत्रण दिले. शिवतीर्थावर ते आपली कन्या आणि चिरंजीवासह आले होते. अंकिता पाटील यांनी फेसबुकवरुन राज ठाकरेंसोबतच्या भेटीचा फोटो शेअर केला आहे.