दानवे उद्धवभेटीला; निमित्त लग्नपत्रिकेचं

मटा ऑनलाइन वृत्त । मुंबई

राज्यातील १० महापालिका तसेच जिल्हा परिषदा व पंचायत समितींसाठी दुसऱ्या टप्प्यातील मतदान काल, मंगळवारी पार पडलं असताना आज भाजपचे प्रदेशाध्यक्ष रावसाहेब दानवे यांनी मुलाच्या लग्नाचं निमंत्रण देण्याच्या निमित्ताने शिवसेना पक्षप्रमुख उद्धव ठाकरे यांची मुंबईतील 'मातोश्री' निवासस्थानी भेट घेतली.

पालिका, जिल्हा परिषद, पंचायत समिती निवडणूक शिवसेनेने स्वबळावर लढली. शिवसेनेने भाजपशी युती तोडत या निवडणुकीत स्वबळ आजमावलं. युती तुटल्यामुळे त्याचे जोरदार पडसाद निवडणुकीच्या प्रचारात उमटले. दोन्ही पक्षांच्या नेत्यांनी एकमेकांवर पातळी सोडून टीका केली. शिवसेना पक्षप्रमुख उद्धव ठाकरे आणि मुख्यमंत्री देवेंद्र फडणवीस यांच्यात तर चांगलंच शब्दयुद्ध रंगलं. आता प्रचार संपला, मतदानही झालं तसा हा तणाव काहीसा निवळताना दिसत असून उद्या सर्वत्र मतमोजणी होत असतानाच आज दानवे 'मातोश्री' निवासस्थानी दाखल झाल्याने या भेटीचे अनेक अर्थही काढले जाऊ लागले आहेत.

दानवे यांच्या मुलाचं लग्न २ मार्च रोजी असून आजचा मुहूर्त साधून त्यांनी उद्धव यांना लग्नपत्रिका देत आग्रहाचं निमंत्रण दिलं. यावेळी दोन्ही नेत्यांनी छायाचित्रासाठी हसतमुखाने पोजही दिली. दोन्ही नेत्यांच्या चेहऱ्यावरील हे हास्य बरंच काही सांगणारं होतं. दानवे यांनी आज सकाळी माध्यमांशी बोलताना, भाजपला स्पष्ट बहुमत मिळेल, आम्हाला कुणाच्या आधाराची गरज लागणार नाही, असे नमूद करत एकप्रकारे शिवसेनेची आम्हाला गरज नाही, असेच सांगण्याचा प्रयत्न केला होता. मात्र या वक्तव्यामध्ये दिसणारी कटुता उद्धवभेटीत अजिबात दिसली नाही.