मुलुंडच्या सहाही जागांवर कमळ उमलले

मटा ऑनलाइन वृत्त । मुंबई

मुंबई महापालिकेत महापौर बसविण्याचे भाजपचे स्वप्न धुळीस मिळाले असले तरी मुलुंडमध्ये मात्र भाजपला घवघवीत यश मिळाले आहे. गुजराती बहूल असलेल्या मुलुंडमधील सहाही जागांवर भाजपचे उमेदवार निवडून आले असून हा शिवसेनेसह काँग्रेस आणि राष्ट्रवादीसाठीही मोठा धक्का असल्याचं मानलं जातयं.

मुलुंडच्या वॉर्ड क्रमांक १०३ मधून मनोज कोटक, १०४ मधून प्रकाश गंगाधरे, १०५ मधून कल्पना केणी, १०६ मधून प्रभाकर शिंदे, १०७ मधून समिता कांबळे आणि १०८ मधून नील सोमय्या निवडून आले आहेत. मुलुंडमध्ये भाजपचे केवळ तीनच नगरसेवक होते. त्यात दोन राष्ट्रवादी आणि एक मनसेचा नगरसेवक होते. भाजपने मनसे आणि राष्ट्रवादीचे वर्चस्व असलेल्या या तिन्ही जागा खेचून आणत मुलुंडमध्ये कमळ फुलविले आहे. विशेष म्हणजे महापालिकेतील माजी विरोधी पक्षनेते प्रभाकर शिंदे हे शिवसेनेतून भाजपमध्ये दाखल झाले होते. शिंदे यांनी भाजपमध्ये येऊन रिस्क घेतल्याचं बोललं जात होतं. पण सर्व अंदाज फोल ठरवत शिंदे यांनी विजय संपादन केला आहे.