...अन 'टाय' लढत भाजपने जिंकली!

मटा ऑनलाइन वृत्त । मुंबई

मुंबईतील वॉर्ड क्र. २२०मध्ये भाजपचे उमेदवार अतुल शहा यांना 'लॉटरी' लागली आहे. या वॉर्डमध्ये शहा आणि शिवसेनेचे उमेदवार सुरेंद्र बागलकर यांना फेरमतमोजणीतही समसमान मते मिळाल्याने दोन्ही उमेदवारांच्या संमतीने चिट्ठी टाकून निर्णय घेण्यात आला. पाच वर्षांच्या मुलीने ही चिठ्ठी काढली. त्यात शहा यांच्या बाजूने कौल लागला आणि शहा यांना विजयी घोषित करण्यात आले.

अतुल शहा आणि सुरेंद्र बागलकर यांच्यात वॉर्ड क्र. २२० मध्ये 'कांटे की टक्कर' पाहायला मिळाली. सुरुवातीला बागलकर आघाडीवर होते मात्र, मतमोजणीच्या अकराव्या फेरीनंतर चित्र बदललं. बाराव्या आणि तेराव्या फेरीत शहा यांनी मतांचा फरक भरून काढला आणि दोघांमधील चुरशीची लढत टाय झाली. विशेष म्हणजे त्यानंतर फेरमतमोजणी घेण्यात आली पण त्याचा काहीच उपयोग झाला नाही.

फेरमतमोजणीत दोन्ही उमेदवारांना समसमान मतंच पडली. त्यामुळे एकतर लॉटरी पद्धतीने निर्णय द्यायचा किंवा त्याला नकार असल्यास उमेदवारांना कोर्टात जाण्यास सांगायचे, असे दोनच पर्याय होते. त्यातला चिठ्ठीचा पर्याय दोन्ही उमेदवारांनी मान्य केला आणि त्यात शहा यांचं नशीब फळफळलं. पालिका आयुक्तांच्या समक्ष ही लॉटरी काढण्यात आली. शहा यांचा विजय शिवसेनेनेही मान्य केला असून मतमोजणी कक्षात उपस्थित असलेले शिवसेना नेते संजय राऊत यांनी शहा यांची गळाभेट घेऊन अभिनंदन केले.