भाजपच्या प्रचाराची सांगता सोमय्या मैदानावर

मटा ऑनलाइन वृत्त। मुंबई

महापालिका निवडणुकीच्या प्रचाराची सांगता दणक्यात करण्यासाठी निवडण्यात आलेल्या वांद्रे-कुर्ला संकुलाच्या मैदानाचा हट्ट भाजपने सोडला असून भाजप आता आपली शेवटची सभा सोमय्या मैदानावरच घेणार आहे. याचे कारण म्हणजे भाजपला शत्रू क्रमांक एक समजणाऱ्या शिवसेना या पक्षाच्या निवडणूक प्रचाराची सांगता त्याच दिवशी वांद्रे-कुर्ला संकुलाच्या मैदानावर होत आहे. या दोन पक्षाच्या शेवटच्या सभा एकाच ठिकाणी झाल्यास दोन्ही पक्षांचे कार्यकर्ते एकमेकांसमोर उभे ठाकण्याची शक्यता आहे. यामुळे कायदा आणि सुव्यवस्थेचा प्रश्न निर्माण होणार असल्याने भाजपने आपला हट्ट सोडला आहे.

मात्र, इथे सभा घेण्याची परवानगी आमच्याकडे असताना केवळ शिवसेचा बालहट्ट पुरवण्यासाठी आम्ही तिथे सभा न घेता सोमय्या मैदानावर सभा घेत आहोत असे स्पष्टीकरण मुंबई भाजपचे अध्यक्ष आशीष शेलार यांनी या मुद्द्यावर बोलताना दिले आहे.

शेलार पुढे म्हणाले की, वांद्रे-कुर्ला संकुलाचे मैदान कुणाला मिळणार याबाबत शिवसेना नेते थयथयाट करत आहेत. वांद्रे-कुर्ला संकुलाचे मैदान आम्हाला मिळावे यासाठी आम्ही एमएमआरडीएकडे ११ तारखेला अर्ज केला. पुन्हा २४ तारखेला पार्किंगसाठी अर्ज केला. दोन्ही परवानग्या आमच्याकडे आहेत. तरीही आम्ही शिवसेनेचा बालहट्ट पुरवतो. सभेचा मार्ग सुकर असला तरी आम्ही मोठ्या भावाच्या भूमिकेत आहोत. म्हणूनच आम्ही बालहट्ट पुरवण्याचे ठरवले. आता आम्ही सोमय्या मैदानावर सभा करू अशी भूमिका शेलार यांनी जाहीर केली.

शेलार याबाबत बोलताना पुढे म्हणाले, की भाजप सध्या मोठ्या भावाच्या भूमिकेत आहे. या मैदानावर १८ तारखेला कोणाची सभा होणार हा महत्त्वाचा मुद्दा नाही असेही शेलार म्हणाले. शिवसेना आपल्या पराभूत मनोवृत्तीचे दर्शन आत्तापासूनच करत आहे. शिवसेनेने हार पत्करली असल्याचेही ते म्हणाले. आम्ही मोठ्या भावाच्या भूमिकेत असल्याने शिवसेना बालहट्ट आणि चिल्लरपणा सातत्याने दाखवत आहे असा टोलाही शेलार यांनी लगावला आहे.