म. टा. विशेष प्रतिनिधी, मुंबई
एमआयएमचे माजी आमदार वारिस पठाण यांच्या प्रक्षोभक भाषणाचा निषेध करण्यासाठी मुंबई भाजपतर्फे शुक्रवारी भायखळा रेल्वे स्टेशनजवळ मोर्चा काढण्यात आला. तसेच पठाण यांच्याविरोधात गुन्हा दाखल करून त्यांना अटक करण्यात यावी, अशी मागणीही भाजपने केली.
वारिस पठाण यांनी, आम्ही १५ कोटी उर्वरित १०० कोटींना भारी पडू, असे प्रक्षोभक वक्तव्य गुरुवारी एका सभेत केले होते. यावरून पठाण यांच्यावर कारवाई करण्याची मागणी होत आहे. भाजपचे मुंबई उपाध्यक्ष रोहिदास लोखंडे यांच्या नेतृत्वाखाली भाजपचा मोर्चा काढण्यात आला. त्यांनी पठाण यांच्या वक्तव्याचा निषेध केला. तसेच, भायखळा पोलिस ठाण्यात त्यांच्याविरोधात गुन्हा दाखल करण्यात यावा, अशी मागणीही केली.
पठाण यांच्याविरोधात यावेळी भाजपच्या कार्यकत्यांनी घोषणा दिल्या. या मोर्चानंतर कुलाबा विधानसभा मतदारसंघाचे आमदार राहुल नार्वेकर आणि रोहिदास लोखंडे यांनी भायखळा पोलिस ठाण्यात वारिस पठाण यांच्याविरोधात तक्रार दाखल केली.