धक्कादायक! मुंबईतील सायन रुग्णालयात रक्ताचा काळाबाजार

मुंबई: शहरात रक्ताचा तीव्र तुटवडा असल्याने थॅलेसेमिया असलेल्या मुलांचे कुटुंबीय रक्ताच्या उपलब्धतेसाठी करोनासंसर्गातही धावपळ करत असताना पालिकेच्या लो. टिळक रुग्णालयाच्या थॅलेसेमिया सेंटरमधील वॉर्डबॉय या रक्ताची विक्री करत असल्याचा धक्कादायक प्रकार पुढे आला आहे. थॅलेसेमियाच्या रक्ताची निकड असलेल्या काही पालकांनी यासंदर्भात तीव्र संताप व्यक्त केला. पैसे असते तर लो. टिळक रुग्णालयात कशासाठी गेलो असतो, असा व्यथित प्रश्न त्यांनी उपस्थित करतानाच मुलांना योग्य उपचार मिळणार नाहीत, रक्त मिळणार नाही, या भीतीने त्यांनी नाव देण्यास नकार दिला. मात्र हातावर पोट असलेल्या या गरीब पालकांनी हा प्रकार रुग्णालय प्रशासनाला कळायला हवा, अशी मागणी आवर्जून केली.

यासंदर्भात मिळालेल्या माहितीनुसार, ज्या थॅलेसेमियाच्या मुलांचे हिमोग्लोबीन अतिशय कमी असते, त्यांच्या पालकांना हेरून हा वॉर्डबॉय २०० ते ५०० रुपयांची मागणी करतो. पैसे दिले की १५ मिनिटांत रक्त उपलब्ध होते. रक्त वेळेत मिळाले नाही तर मूल जगणार नाही ही भीती या पालकांना असल्याने ते नाईलाजाने पैसे देण्यास तयार होता. मात्र रक्तपेढीत रक्त नसल्याचे सांगितल्यानंतर या वॉर्डबॉयकडे ते कुठून येते, असा प्रश्न या पालकांनी उपस्थित केला आहे.शस्त्रक्रिया करण्यासाठी जे रक्त लागते, ते रक्तपेढीतून दिले जाते. थॅलेसेमियाच्या रुग्णांना रक्त देताना रक्तगटासह इतर बाबींही तपासून पाहाव्या लागतात. त्यामुळे हे रक्त शस्त्रक्रियेच्या नावावर देऊन ते वापरात न आल्यास पुन्हा रक्तपेढीमध्ये जमा होणे अपेक्षित असते. हे रक्त या थॅलेसेमियाच्या रुग्णांसाठी विकले जाण्याची शक्यता नाकारता येत नाही. त्यामुळे रक्तपेढीमधील कोण तंत्रज्ञ यामध्ये सहभागी आहे, याचीही कसून चौकशी करण्याची गरज रुग्णालयातील वैद्यकीयतज्ज्ञांनी व्यक्त केली.अपघात झालेल्या रुग्णाला रक्ताची गरज भासू शकते, यासाठी आपत्कालीन वैद्यकीय स्थितीत थोडे रक्त राखून ठेवले जाते. त्याचा वापरही मागील किती दिवसांमध्ये किती प्रमाणात झाला आहे, ते नेमके कोणाला देण्यात आले याचीही चौकशी करावी, अशीही मागणी होत आहे.लो. टिळक रुग्णालयात थॅलेसेमिया असलेल्या या मुलांसाठी आरोग्यकार्यकर्ते म्हणून काम करणाऱ्या राहुल साळवे यांच्याकडूनही रक्तदाते उपलब्ध केले जातात. आपणासही अशा तक्रारी आल्याचे त्यांनी सांगितले. या मुलांच्या हाताला जे कनेक्टर लावले जाते, तेदेखील काढले जात नव्हते. त्यासंदर्भातही प्रशासनाकडे तक्रारींची नोंद करण्यात आल्याचे ते म्हणाले.