म. टा. प्रतिनिधी, मुंबई
विविध कलांचा संगम असणाऱ्या आयआयटी मुंबईच्या 'मूड इंडिगो'ची एक झलक रविवारी नरिमन पॉइंट येथील एनसीपीएच्या सभागृहात पाहायला मिळाली. निमित्त होते ते 'आवेग' या आयआयटी मुंबईच्या सांस्कृतिक कार्यक्रमाचे. गत वर्षीच्या 'मूड इंडिगो' फेस्टिव्हलच्या आठवणींना उजाळा देण्यासाठी तसेच उल्लेखनीय सादरीकरणांना सन्मानित करण्यात 'आवेग' या सांस्कृतिक कार्यक्रमाचे आयोजन आयआयटीअन्सनी केले होते. यावेळी विविध नृत्यप्रकारांचे तसेच नाट्यप्रवेशाचे सादरीकरण करण्यात आले. 'महाराष्ट्र टाइम्स' याचा मीडिया पार्टनर आहे.
यावेळी 'आवेग'च्या रंगमंचावर 'नृत्यांजली'सारखी शास्त्रीय नृत्य स्पर्धा, 'संस्कृती' सारखी लोकनृत्य स्पर्धा, 'सुशिंगार' ही शास्त्रीय संगीत स्पर्धा तर 'थर्ड बेल'सारखी नाट्यस्पर्धा विजेत्या स्पर्धकांनाही आपल्या कलेचे सादरीकरण केले. अभ्यासातून थोडावेळ कलेला देण्याच्या उद्देशाने आयोजित करण्यात आलेल्या या कार्यक्रमाला विद्यार्थ्यांना शाब्बासकीची थाप देण्यासाठी मनोरंजन विश्वातील शाल्मली खोलगडे, मर्झी पेस्टोनजी, शरत सक्सेना आदी कलाकार उपस्थित होते. आशियातील सर्वांत मोठा सांस्कृतिक महोत्सव मानल्या जाणाऱ्या आयआयटी मुंबईच्या 'मूड इंडिगो'च्या पूर्वतयारीचे बिकूल असल्याचे आयआयटीअन्सनी सांगितले.