चाकरमान्यांची गैरसोय; कर्नाक पूल पाडण्यासाठी आज रात्रीपासून मध्य रेल्वेचा मेगाब्लॉक

मुंबई : ब्रिटिशकालीन कर्नाक पूल पाडण्याचे काम आज, शनिवारी रात्री ११ वाजल्यापासून सुरू केले जाणार आहे. त्यामुळे सीएसएमटी ते भायखळा या स्थानकांदरम्यान लोकल वाहतूक २१ तास आणि मेल-एक्स्प्रेस वाहतूक २७ तास बंद राहणार आहे.

प्रवाशांच्या सुविधेसाठी भायखळा, परळ, कुर्ला, दादर या स्थानकांतून ठाणे, कल्याण, कर्जत, कसारा या मार्गावर लोकल धावणार आहेत. या फेऱ्यांची संख्या कमी असणार आहे. छत्रपती शिवाजी महाराज टर्मिनसजवळील अनेक कार्यालये, बाजारपेठा तसेच व्यापारी पेठा रविवारी खुल्या असतात. यामुळे उद्या, रविवारी प्रवास करणाऱ्या प्रवाशांना गर्दीतून वाट काढावी लागणार आहे.

ब्लॉकसाठी जय्यत तयारी

३५० वजनी क्षमता असलेल्या ४ क्रेन, ४ हायड्रा मशीन, ४० गॅस कटर आणि तितकेच गॅस कटर पर्यायी म्हणून ठेवण्यात येतील. पुलावर बांधकाम विभागाचे २०० कर्मचारी आणि पुलाखाली ओएचई विभागाचे १५० आणि अन्य असे एकूण ४०० कर्मचारी कार्यरत असणार आहेत. आपत्कालीन स्थितीसाठी अतिरिक्त क्रेन आणि हायड्रा मशीन अशी जय्यत तयारी करण्यात आली आहे.

कोपरी पुलासाठी दोन रात्री ब्लॉक

मुंबई : मुलुंड ते ठाणे दरम्यान कोपरी पुलाचे सात गर्डर उभारण्यासाठी मध्य रेल्वेने आज, शनिवार व उद्या, रविवार (१९-२० नोव्हेंबर) आणि रविवार-सोमवार (२०-२१ नोव्हेंबर) मध्यरात्री ब्लॉक घेण्याचा निर्णय घेतला आहे. ठाण्यातील सहा मार्गिकांवर हा ब्लॉक असणार आहे. शनिवार-रविवार आणि रविवार-सोमवार मध्यरात्री १.३० ते पहाटे ३.४५ पर्यंत ब्लॉक असणार आहे.