विकासकामांत वाढ

तीन महिन्यांत पालिकेचे १,०२४.३३ कोटी रुपये खर्च

म. टा. खास प्रतिनिधी, मुंबई

अर्थसंकल्पात तरतूद केलेल्या निधीचा वार्षिक फक्त १५ ते २० टक्के हिस्साच खर्च होत असल्याने विकासकामांना फटका बसत असल्याची ओरड नगरसेवकांकडून केली जात होती. त्यावर पालिकेने तरतूद निधीच्या खर्चाचा उतारा काढला आहे. यंदाच्या मार्च ते जुलै या तीन महिन्यांत चालू अर्थसंकल्पातील १२.६० टक्के रक्कम म्हणजे १,०२४.३३ कोटी रुपये खर्च करण्यात आल्याचा दावा प्रशासनाने केला आहे. मागील वर्षी हेच प्रमाण फक्त ४.४९ टक्के इतके होते.

पालिकेच्या अर्थसंकल्पी तरतुदींच्या अंदाजातील खर्चविषयक बाबींची अंमलबजावणी ही आर्थिक वर्षाच्या शेवटच्या तिमाहीत अधिक होत असल्याचे निदर्शनास आले होते. यामुळे तरतुदींचा खर्च करण्यावर मर्यादा येत होत्या. ही बाब लक्षात घेऊन पालिकेचा अर्थसंकल्प तयार करताना अर्थसंकल्पाची प्रत्यक्ष अंमलबजावणीचे नियोजन करण्याच्या सूचना पालिका आयुक्त अजय मेहता यांनी संबंधित खात्यांना दिले होते. त्यानुसार या वर्षीचा अर्थसंकल्पी अंदाज तयार करण्यात आला. तसेच टेंडर प्रक्रिया ठरलेल्या वेळेत निघत असल्याने या सुधारणांचे सकारात्मक परिणाम पहिल्या तिमाहीत दिसू लागल्याचे प्रशासनातर्फे सांगण्यात आले आहे.

गेल्या आर्थिक वर्षाच्या पहिल्या तिमाहीत १ एप्रिल ते ३० जून २०१६ या कालावधीत अर्थसंकल्पात विकासकामांसाठी १२,९५७.८३ कोटींपैकी ४.४९ टक्के म्हणजे ५८१.८६ कोटी एवढी रक्कम प्रत्यक्ष खर्च झाली होती. यंदाच्या सन २०१७-१८ या आर्थिक वर्षात विकासकामांसाठी ८,१२७.०८ कोटी रुपये ठेवण्यात आले आहेत. यापैकी १२.६० टक्के म्हणजे १०२४.३३ कोटी रुपये खर्च करण्यात आले आहेत.

यंदाच्या अर्थसंकल्पात रस्ते व वाहतूक खात्यासाठी १,०९४.८२ कोटींची तरतूद करण्यात आली आहे. पैकी २३.१७ टक्के रकमेचा विनियोग पहिल्या तिमाहीत करण्यात आला आहे. गेल्यावर्षी ही टक्केवारी ०.३० टक्के होती. पुलांसाठी असणाऱ्या तरतुदींपैकी गेल्यावर्षी ३.६० टक्के रक्कम खर्च झाली होती. यावर्षी ही टक्केवारी २०.४१ एवढी आहे. पर्जन्यजल वाहिन्या खात्यासाठी यावर्षी ४७५ कोटींची तरतूद करण्यात आली आहे. यापैकी ४९.७० टक्के एवढी रक्कम खर्च झाली आहे.

गेल्यावर्षी ही टक्केवारी ११.२९ एवढी होती. पालिकेच्या प्रमुख रुग्णालयांसाठी यंदा १९०.४८ कोटी तरतूद करण्यात आली आहे. यापैकी ४२.७४ टक्के रक्कम खर्च झाली आहे. गेल्यावर्षी ही टक्केवारी ११.०१ एवढी होती.

जल विभागात १५.७८ टक्के खर्च

जल अभियंता खात्यासाठी यावर्षी ६०६.३६ कोटी तरतूद करण्यात आली आहे. यापैकी १५.७८ टक्के रक्कम पहिल्या तिमाहीत खर्च झाली आहे. गेल्यावर्षी ही टक्केवारी ८.७५ होती. इतर खात्यांच्या अर्थसंकल्पी तरतुदींमधील खर्च विषयक विनयोगातदेखील लक्षणीय वाढ झाली असल्याचा दावा करण्यात आला आहे.