महापालिका इकोफ्रेंडली

‘बी’ कार्यालयात सोलार, रेनवॉटर आणि एलईडी

मुंबई ः मुंबईत नवीन बांधकामांना रेनवॉटर हार्वेस्टिंग, एलईडी आदी इकोफ्रेंडली यंत्रणांची सक्ती करणाऱ्या महापालिकेने स्वतःही पर्यावरणाभिमुख यंत्रणा होण्याचा निर्णय घेतला आहे. डोंगरी, भेंडीबाजार, मोहम्मद अली रोड या भागातील बी विभाग कार्यालयात रेनवॉटर हार्वेस्टिंग, एलईडी आणि सोलार एनर्जी पॅनेल उभारून पालिका इकोफ्रेंडली होत आहे. इकोफ्रेंडली होणारे अशा प्रकारचे हे मुंबईतील पालिकेचे पहिले विभाग कार्यालय असेल.

दक्षिण मुंबईतील जे. जे. रुग्णालयाच्या परिसरातील गजबजलेल्या मश‌दि बंदर, डोंगरी विभागाचा समावेश असलेले बी विभाग कार्यालय आहे. या इमारतीच्या छतावर नुकतेच सौरऊर्जा पॅनेल बसवण्यात आले आहे. त्यानंतर या इमारतीत आता रेन वॉटर हार्वेस्टिंग प्रकल्प सुरू होत आहे. तसेच इमारतीची संपूर्ण विद्युत यंत्रणा एलईडीने बदलली जाणार आहे. इमारतीच्या ८०० चौरस मीटर छतावर नुकतेच २० किलोवॉट सोलार पॅनेल बसवण्यात आले आहे. त्यामुळे पालिकेची वार्षिक चार लाख रुपये वीजबचत होत आहे. वीजबचतीमुळे येत्या पाच वर्षांत या सोलार पॅनेलचा खर्च भरून निघणार आहे. येत्या काळात २५ किलोवॉटचे पॅनेल लावून आणखी वीज बचतीचा प्रयत्न केला जाणार आहे.

तीन मजली इमारत असलेल्या या कार्यालयाच्या छतावरून येणारे पावसाचे पाणी थेट गटारात वाहून जात असल्याने या पाण्याचा पुनर्वापर करण्यात येणार आहे. त्यासाठी इमारतीच्या परिसरात रेनवॉटर हार्वेस्टिंग यंत्रणा उभारली जात आहे. त्यामध्ये दररोज २० हजार लिटर पाणी जमा होणार आहे. या पाण्याचा वापर स्वच्छतागृह व कार्यालयीन स्वच्छतेसाठी केला जाणार आहे. इमारतीत विविध कार्यालयांसाठी एकूण ३५० ते ४०० ट्यूबलाइट लागतात. या ट्युबलाइट एलईडीने बदलल्या जाणार आहेत. त्यामुळे वार्षिक ५० ते ७५ हजार रुपये वीजेची बचत होणार आहे. कार्यालयीन वीजवापरासाठी सध्या दोन ते तीन लाख रुपये खर्च येतो. हा खर्च येत्या काळात आणखी कमी करता येईल का, यासाठी प्रयत्न केले जाणार आहे.


पर्यावरणाच्या जवळ जाण्याचा प्रयत्न

कार्यालयीन वापरासाठी सोलार, रेनवॉटर हार्वेस्टिंग, एलईडी आणून पर्यावरणाच्या अधिकाधिक जवळ जाण्याचा आमचा प्रयत्न आहे. यातून पालिकेचे पैसे वाचणार आहेत, तसेच कार्यालयात इकोफ्रेंडली यंत्रणा उभारता येणार आहे. असे बी विभागाचे सहाय्यक आयुक्त उदयकुमार शिरूरकर यांनी सांगितले.