म. टा. प्रतिनिधी, मुंबई
कमला मिल कम्पाऊंड येथील अग्निप्रलयात तब्बल १४ निष्पापांचा जीव गेल्यानंतर अखेर पालिका प्रशासनाला जाग आली असून, शनिवारी दिवसभरात एकूण ३१४ अनधिकृत बांधकामांवर कारवाई करण्यात आली. त्यांच्यात १००हून अधिक हॉटेल, पब आणि मॉल यांचा समावेश होता. कमला मिल कम्पाऊंडमधील प्रसिद्ध ‘प्रवास’, ‘स्मॅश’ आणि ‘कोड’ ही हॉटेल्स आणि दक्षिण मुंबईतील ‘जाफरान’ आणि दादर येथील ‘कैलास लस्सी’वरही कारवाईचा बडगा उगारण्यात आला.
कमला मिलमध्ये गुरुवारी मध्यरात्री घडलेले अग्निकांड येथील वाढत चाललेल्या अनधिकृत बांधकामांमुळेच घडल्याची टीका झाल्यानंतर शनिवारी पालिका प्रशासनाने खडबडून जागे होत अनधिकृत कामांविरोधात कारवाईचा धडाका लावला. पालिका आयुक्त अजय मेहता यांनी २४ विभागांच्या सहाय्यक आयुक्तांना कारवाईचे आदेश दिले. सर्व विभागांमध्ये विशेष पथके तयार करून त्यांद्वारे उपहारगृहे, हॉटेल, मॉल इत्यादींमध्ये ही मोहीम राबवण्यात आली. लोअर परळसह शिवाजी पार्क, मुलुंड, दहिसर, मालाड, पारसी जिमखाना, ग्रॅण्ट रोड, अंधेरी आणि घाटकोपर याठिकाणी कारवाईचा बडगा उगारण्यात आला. यासाठी प्रत्येक विभागांमध्ये प्रत्येकी तीन पथके तयार करण्यात आली होती. या दिवसभराच्या कारवाईत महापालिकेचे सुमारे १ हजार कामगार-कर्मचारी-अधिकारी सहभागी झाले होते.
नववर्षांच्या पार्टीवर नजर
नववर्षांच्या प्रारंभी रविवारी थर्टीफस्टनिमित्त मुंबईतील अनेक हॉटेल, पब यांनी पार्ट्यांचे आयोजन केले आहे. या पार्ट्यांवर पालिका प्रशासनाने आपले लक्ष वेधले असून, या पार्ट्यांचे आयोजन करताना आवश्यक त्या परवानग्या आणि अग्निशमन यंत्रणा बसविण्यात आल्या आहेत की नाही? याची तपासणी करण्याचे थेट आदेश पालिका आयुक्त अजय मेहता यांनी दिले आहेत.
तोडकाम कुठे आणि कसे…
-कारवाईदरम्यान एकूण ६२४ ठिकाणांची तपासणी करण्यात आली.
-त्यापैकी अनियमितता/अनधिकृत बांधकामे आढळून आलेल्या ३१४ ठिकाणी तोडकाम करण्यात आले.
-७ उपहारगृहे सील करण्यात आली असून ४१७पेक्षा अधिक गॅस सिलिंडर जप्त करण्यात आले.
अतिरिक्त आयुक्तांची हजेरी
पालिकेच्या इतिहासात प्रथमच तिन्ही अतिरिक्त आयुक्त तोडकाम सुरू असलेल्या ठिकाणी जातीने उपस्थित होते. अतिरिक्त आयुक्त (पश्चिम उपनगरे) आय. ए. कुंदन, अतिरिक्त आयुक्त (पूर्व उपनगरे) विजय सिंघल, अतिरिक्त आयुक्त (शहर) आबासाहेब जऱ्हाड यांचा समावेश होता.
कमला मिल कम्पाऊंड येथील अग्निप्रलयात तब्बल १४ निष्पापांचा जीव गेल्यानंतर अखेर पालिका प्रशासनाला जाग आली असून, शनिवारी दिवसभरात एकूण ३१४ अनधिकृत बांधकामांवर कारवाई करण्यात आली. त्यांच्यात १००हून अधिक हॉटेल, पब आणि मॉल यांचा समावेश होता. कमला मिल कम्पाऊंडमधील प्रसिद्ध ‘प्रवास’, ‘स्मॅश’ आणि ‘कोड’ ही हॉटेल्स आणि दक्षिण मुंबईतील ‘जाफरान’ आणि दादर येथील ‘कैलास लस्सी’वरही कारवाईचा बडगा उगारण्यात आला.
कमला मिलमध्ये गुरुवारी मध्यरात्री घडलेले अग्निकांड येथील वाढत चाललेल्या अनधिकृत बांधकामांमुळेच घडल्याची टीका झाल्यानंतर शनिवारी पालिका प्रशासनाने खडबडून जागे होत अनधिकृत कामांविरोधात कारवाईचा धडाका लावला. पालिका आयुक्त अजय मेहता यांनी २४ विभागांच्या सहाय्यक आयुक्तांना कारवाईचे आदेश दिले. सर्व विभागांमध्ये विशेष पथके तयार करून त्यांद्वारे उपहारगृहे, हॉटेल, मॉल इत्यादींमध्ये ही मोहीम राबवण्यात आली. लोअर परळसह शिवाजी पार्क, मुलुंड, दहिसर, मालाड, पारसी जिमखाना, ग्रॅण्ट रोड, अंधेरी आणि घाटकोपर याठिकाणी कारवाईचा बडगा उगारण्यात आला. यासाठी प्रत्येक विभागांमध्ये प्रत्येकी तीन पथके तयार करण्यात आली होती. या दिवसभराच्या कारवाईत महापालिकेचे सुमारे १ हजार कामगार-कर्मचारी-अधिकारी सहभागी झाले होते.
नववर्षांच्या पार्टीवर नजर
नववर्षांच्या प्रारंभी रविवारी थर्टीफस्टनिमित्त मुंबईतील अनेक हॉटेल, पब यांनी पार्ट्यांचे आयोजन केले आहे. या पार्ट्यांवर पालिका प्रशासनाने आपले लक्ष वेधले असून, या पार्ट्यांचे आयोजन करताना आवश्यक त्या परवानग्या आणि अग्निशमन यंत्रणा बसविण्यात आल्या आहेत की नाही? याची तपासणी करण्याचे थेट आदेश पालिका आयुक्त अजय मेहता यांनी दिले आहेत.
तोडकाम कुठे आणि कसे…
-कारवाईदरम्यान एकूण ६२४ ठिकाणांची तपासणी करण्यात आली.
-त्यापैकी अनियमितता/अनधिकृत बांधकामे आढळून आलेल्या ३१४ ठिकाणी तोडकाम करण्यात आले.
-७ उपहारगृहे सील करण्यात आली असून ४१७पेक्षा अधिक गॅस सिलिंडर जप्त करण्यात आले.
अतिरिक्त आयुक्तांची हजेरी
पालिकेच्या इतिहासात प्रथमच तिन्ही अतिरिक्त आयुक्त तोडकाम सुरू असलेल्या ठिकाणी जातीने उपस्थित होते. अतिरिक्त आयुक्त (पश्चिम उपनगरे) आय. ए. कुंदन, अतिरिक्त आयुक्त (पूर्व उपनगरे) विजय सिंघल, अतिरिक्त आयुक्त (शहर) आबासाहेब जऱ्हाड यांचा समावेश होता.