ध्वनिनियमांचे उल्लंघन झाल्यास कारवाई

म. टा. विशेष प्रतिनिधी, मुंबई

न्यायालयाचा आदेश असूनही गेल्या वर्षी गणेशोत्सवादरम्यान ७८ मंडपांपैकी ४२ बेकायदा मंडपांवर कारवाई केली नसल्याने मुंबई महापालिका आयुक्त अजय मेहता यांच्याविरुद्ध न्यायालय अवमानाबद्दल काढलेली 'कारणे दाखवा' नोटीस मुंबई उच्च न्यायालयाने शुक्रवारी मागे घेतली. मात्र, त्याचवेळी आयुक्तांनी आदेशाचे उल्लंघन हेतूपूर्वक केले नसल्याने नोटीस मागे घेण्यात येत असली तरी यापुढे कोणत्याही धार्मिक उत्सवांदरम्यान न्यायालयाच्या आदेशांचे उल्लंघन झाल्यास त्याकडे अत्यंत गांभीर्याने पाहून न्यायालय अवमानाबद्दल कठोर कारवाई केली जाईल, असा इशाराही न्यायालयाने दिला.

'आयुक्त मेहता यांचे प्रतिज्ञापत्र पाहता न्यायालयाच्या पूर्वीच्या काही आदेशांचे पालन झाले नसल्याचे स्पष्ट होत आहे. मेहता दिलेले स्पष्टीकरण त्यांनी हेतूपूर्वक उल्लंघन केले नसल्याचे स्पष्ट होते. केवळ त्या कारणाने त्यांच्याविरुद्धची नोटीस मागे घेत आहोत. मात्र, यापुढे न्यायालयीन आदेशांचे उल्लंघन झाल्यास न्यायालयाचा अवमान म्हणून त्याकडे अत्यंत गांभीर्याने पाहिले जाईल', असे खंडपीठाने आदेशात स्पष्ट केले.