मॅजेस्टिक गप्पांसोबत ग्रंथ प्रदर्शनही
म. टा. प्रतिनिधी, मुंबई
विलेपार्ले पूर्व येथील लोकमान्य सेवा संघात मॅजेस्टिक बुक डेपोतर्फे सुरू असलेल्या मॅजेस्टिक गप्पांच्या निमित्ताने यंदाही ग्रंथप्रदर्शनाचे आयोजन करण्यात आले आहे.
लोकमान्य सेवा संघाच्या २५०० चौरस फूटांच्या पटांगणात सुरू असलेल्या या भव्य ग्रंथप्रदर्शनात वाचकप्रेमींसाठी १० हजार ग्रंथांची मेजवानी उपलब्ध करून देण्यात आली आहे. यात मराठी आणि इंग्रजी भाषेतील पुस्तकांचा समावेश आहे. १५ जानेवारीपर्यंत हे प्रदर्शन खुले आहे.
मॅजेस्टिक बुक डेपोतर्फे विलेपार्ले येथील लोकमान्य सेवा संघात सध्या मॅजेस्टिक गप्पांचे आयोजन करण्यात आले आहे. या गप्पांबरोबरच मुंबईसह राज्यातील सुमारे दीडशे प्रकाशनांच्या पुस्तकांचा समावेश असलेल्या ग्रंथप्रदर्शनाचे आयोजन करण्यात आले आहे. कथा, कादंबरी, ललितलेखन, चरित्रे, बालवाङ्मय या ललित साहित्याबरोबरच धार्मिक, आरोग्य, पाककला, कम्प्युटर, क्रीडा, तत्त्वज्ञान आदी विविध विषयांवरील पुस्तके या प्रदर्शनात असल्याचे मॅजेस्टिकचे अशोक कोठावळे यांनी सांगितले. साहित्य संमेलनात भरविण्यात येणाऱ्या ग्रंथप्रदर्शनाच्या धर्तीवर हे प्रदर्शन भरविण्यात आले असून मुंबईतील अशाप्रकारचे हे एकमेव ग्रंथप्रदर्शन असल्याचे त्यांनी यावेळी नमूद केले.
या प्रदर्शनाचे वैशिष्ट्य म्हणजे ललित लेखनांतर्गत मोडणाऱ्या निवडक पुस्तकांचा वेगळा विभाग येथे उपलब्ध आहे. त्यातील अनेक पुस्तके विशेष सवलतीत उपलब्ध आहेत. इतर अनेक योजना आणि सुविधा वाचकांसाठी देण्यात आल्या आहेत.
हे प्रदर्शन १५ जानेवारीपर्यंत सकाळी १० ते रात्री ९ पर्यंत खुले आहे. वाचनप्रेमींनी या ग्रंथप्रदर्शनास भेट देऊन पुस्तके खरेदी करावीत, असे आवाहन कोठावळे यांनी केले आहे.