ब्रावो ब्रॅबो

टाटा मोटर्स या बड्या कंपनीमधला इंजिनीअर्सचा एक चमू, संपूर्ण भारतीय बनावटीचा एक रोबो असावा असं स्वप्न वीस वर्षांपूर्वी पाहतो आणि ते साकार करण्यासाठी अथक काम करू लागतो. टाटा मोटर्सची उपकंपनी असलेल्या टॅल मॅन्युफॅक्चरिंग सोल्युशन्स या कंपनीकडूनही त्यांना योग्य ते प्रोत्साहन मिळतं आणि मग यातून तयार होतो एक रोबो – टॅल ब्रॅबो!

सिल्व्हियस ब्राबो हा रोमन इतिहासातला एक निधड्या छातीचा, शूर शिपाईगडी. त्यानं एकट्यानं शत्रुच्या महाबलाढ्य सेनानीला मारलं होतं, अशी कथा रोमन साहित्यात सांगितली जाते. ‘मूर्ती लहान पण कीर्ती महान’ असा हा शिपाईगडी. तसाच हा टाटा समूहाचा टॅल ब्रॅबो रोबो! टॅल मॅन्युफॅक्चरिंग सोल्युशन्सचे अध्यक्ष आर. एस. ठाकूर आणि मुख्य कामकाज अधिकारी अमित भिंगुर्डे यांनी हा छोटा जवान नुकताच मुंबईत सादर केला.

दोन रुपांत

एकावेळी दोन किलो आणि १० किलो वजन उचलण्याची क्षमता असलेल्या दोन रूपांमध्ये ब्रॅबो बाजारात दाखल झालाय. संपूर्ण भारतीय बनावटीचा असा रोबो प्रथमच देशात तयार झाल्यामुळे एकप्रकारे नव्या रोबोल्युशनची सुरुवात झालीय असं म्हणता येईल. हे रोबोल्युशन आणण्याचं श्रेय मराठी माणसाकडे जातं ही अभिमानाची गोष्ट असल्याचं बोललं जातंय.

चुका टाळण्यासाठी

यासंदर्भात अमित भिंगुर्डे म्हणाले, की ‘आपल्याला रोबोची निर्मिती करता येईल का हा विचार १९९५पासून मनात घोळत होता. त्यावर सातत्याने काम सुरू होतं. आकाराने छोटा, हाताळण्यास सोपा परंतु शक्तिशाली असा रोबो; तोही देशात तयार झालेला असावा, या दृष्टीने काम सुरू केलं. शेवटी यावर्षी ब्रॅबो तयार झाला. हा रोबो सूक्ष्म, लघु व मध्यम उद्योगांसाठी तयार करण्यात आला आहे. कारखान्यातल्या कामगारांना तेच ते काम करायला सांगितलं तर त्यांच्यासाठी ते कंटाळवाणं होतं. मग त्यांच्याकडून चुका व्हायला लागतात.

ब्रॅबो रोबो मात्र कधीही न थकता तेच ते काम करू शकतो. रोबो माणसाची जागा घेणार असल्याने बेरोजगारी वाढेल, अशी हाकाटी केली जाते. पण प्रत्यक्षात तसं काही होणार नाही. उलट एका रोबोला सांभाळायला, त्याची देखभाल करायला, प्रणाली तयार करायला १० ते १२ जणांची आवश्यकता असते. म्हणजेच तेवढे रोजगार तयार होतात. पाच ते सात लाख रुपयांमध्ये ब्रॅबो उपलब्ध असून तो ‘डल’, ‘डर्टी’ व ‘डेन्जरस’ कामं लीलया पूर्ण करतो.’