म. टा. खास प्रतिनिधी, मुंबई
अपघात विम्यासाठी तक्रारीची प्रत देण्याकरीता पेपर आणि झेरॉक्सची लाच घेणाऱ्या दोन पोलिसांवर लाचलुचपत प्रतिबंधक विभागाच्या (एसीबी) अधिकाऱ्यांनी गुन्हा दाखल केला. पोलिस उपनिरीक्षक दिलीप पवार आणि पोलिस कॉन्स्टेबल सर्जेराव पुंगळे अशी या दोघांची नावे असून दोघेही सांताक्रूझ पोलिस ठाण्यात कार्यरत आहेत.
सांताक्रूझ पोलिस ठाण्याच्या हद्दीमध्ये सुजित पांडे यांच्या मोटार कारला अपघात झाला. दुभाजकाला आदळल्यामुळे कारचे बरेच नुकसान झाले. याबाबत किरकोळ अपघात म्हणून सांताक्रूझ पोलिस ठाण्यात नोंद करण्यात आली होती. अपघात विमा मिळावा यासाठी या तक्रारीची प्रत पांडे यांना हवी असल्याने ते सांताक्रूझ पोलिस ठाण्यात गेले. झेरॉक्स प्रत साक्षांकित करून देण्यासाठी दिलीप पवार यांनी पांडे यांच्याकडे ५०० रुपयांची मागणी केली. पांडे यांनी इतकी रक्कम नसल्याचे सांगताच पवार यांनी प्रिंटआऊट काढण्यासाठी दोनशे रुपयाची पेपरची रिम आणि पोलिस ठाण्यातील विविध अर्जाच्या झेरॉक्स प्रती काढण्यास सांगितले. पेपर रिम आणि झेरॉक्स प्रति घेण्यास सर्जेराव पुंगळे यांनी मदत केल्याचे समोर आल्यानंतर एसीबीने दोघांवर कारवाई केली.