म्हशींमुळे मध्य रेल्वेचा खोळंबा

स्वप्नील शेजवळ, बदलापूर

बदलापूर-वांगणीदरम्यान रेल्वे रूळांवरून जात असलेल्या म्हशींना इंद्रायणी एक्स्प्रेसने धडक दिल्याने इंजिन नादुरूस्त झाले. त्याचा फटका उपनगरीय लोकलसह पुण्याकडे जाणाऱ्या मेल, एक्सप्रेस गाड्यांनाही बसला. सकाळी सातपासून साडेनऊपर्यंत कर्जत-पुण्याकडे वाहतूक बंद झाली होती.

शुक्रवारी सकाळी बदलापूर वांगणी दरम्यान एक्स्प्रेस खोळंबल्याने कर्जत आणि पर्यायाने पुण्याकडे जाणाऱ्या गाड्यांचा खोळंबा झाला. शुक्रवारी सकाळी सातच्या सुमारास बदलापूरहून निघालेल्या इंद्रायणी एक्स्प्रेससमोर म्हशी आल्याने त्या चिरडल्या गेल्या. मात्र त्यामुळे इंजिनाच्या समोरच्या भागातील संरक्षक कर्टलचा भाग नादुरुस्त झाला. त्यामुळे बिघाड झाल्याने इंद्रायणी एक्स्प्रेस तब्बल अडीच तास बदलापूर आणि वांगणी स्थानकादरम्यान खोळंबली होती. त्यामुळे कर्जत, खोपोली आणि पुण्याकडे जाणाऱ्या चाकरमान्यांना याचा मोठा फटका बसला. पहाटेपासून प्रवास करणाऱ्या चाकरमान्यांना या खोळंब्यामुळे मोठा मनस्ताप झाला. तर एक्स्प्रेससह लोकल गाड्यांच्या प्रवाशांनाही याचा मोठा त्रास सहन करावा लागला.

संध्याकाळीही खोळंबा

एकीकडे सकाळी कर्जतकडील वाहतूक अडीच तास खोळंबल्यानंतर संध्याकाळीही गर्दीच्या वेळीच कोपरजवळ तांत्रिक बिघाड झाल्याने लोकलगोंधळ उडाला. कल्याणच्या दिशेने निघालेल्या लोकलमध्ये दिवा ते कोपर दरम्यान तांत्रिक बिघाड उद्भवला. त्यामुळे यामागील सर्वच लोकल रखडल्या. दिवा ते कोपर या सात मिनिटांच्या प्रवासासाठी तब्बल पाऊण तासांचा अवधी लागत होता. रात्री उशिरापर्यंत वेळापत्रक बिघडलेलेच होते.