मुंबई-दिल्ली राजधानी नाशिकमार्गे धावणार,मुख्यमंत्र्यांचे मोठे यश

mahesh.chemte@timesgroup.com

tweet@mchemteMT

मुंबई :
वेगवान आणि शाही सुविधांसाठी ओळखली जाणारी मुंबई-दिल्ली राजधानी एक्स्प्रेस नाशिक मार्गे नेण्यास रेल्वे मंत्रालयाने मंजुरी दिली आहे. त्यामुळे मुंबई-दिल्ली मार्गावर आणखी एक राजधानी एक्स्प्रेस सुरू होणार आहे. मुंबई-अहमदाबाद बुलेट ट्रेनचा विस्तार नाशिकपर्यंत करण्याची मुख्यमंत्री देवेंद्र फडणवीस यांची विनंती रेल्वे मंत्रालयाने धुडकावली होती. मात्र मुंबईतील आगामी रेल्वे प्रकल्प लक्षात घेता मुख्यमंत्र्यांना खूश करण्यासाठी नवीन राजधानी एक्स्प्रेस नाशिक मार्गे सुरू करण्यात येणार असल्याची चर्चा रेल्वे बोर्डाच्या वरिष्ठ अधिकाऱ्यांमध्ये आहे.

देशातील महत्त्वाच्या शहरांना दिल्लीशी जोडणारी महत्त्वाची एक्स्प्रेस म्हणून राजधानी एक्स्प्रेस ओळखली जाते. नाशिकमार्गे राजधानी एक्स्प्रेसला मंजुरी मिळाल्यामुळे मध्य रेल्वेवरून मार्गस्थ होणारी पहिली राजधानी असा बहुमान या एक्स्प्रेसला मिळेल. यामुळे मुंबईसह नाशिक, धुळे, जळगाव या महत्त्वाच्या शहरांतील प्रवाशांना लाभ होणार आहे. 'मुंबई-दिल्ली राजधानी एक्स्प्रेसला नाशिक मार्गे मंजुरी मिळाली असून लवकरच ही सेवा सुरू करण्यात येईल', असा दुजोरा मध्य रेल्वेचे मुख्य जनसंपर्क अधिकारी सुनील उदासी यांनी दिला.

मध्य रेल्वेवरील पहिली राजधानी

मुंबई येथून नाशिक मार्गे दिल्लीला जाण्यासाठी मार्गाची चाचपणी पूर्ण करण्यात आली आहे. नाशिक मार्गे दिल्लीला पोहोचण्यासाठी कमाल २० तास अपेक्षित आहेत. मध्य रेल्वेकडे राजधानीचा अर्धा रेक (निम्मी गाडी) उपलब्ध आहे. रेल्वे बोर्डाच्या मंजुरीनंतर उर्वरित रेक उपलब्ध झाल्यानंतर राजधानी एक्स्प्रेस सुरू करण्यात येईल. नवी 'राजधानी' मुंबई, कल्याण, नाशिकरोड, भुसावळ, भोपाळ, ग्वालियर जंक्शन, दिल्ली किंवा मुंबई, कल्याण, नाशिकरोड, भुसावळ, भोपाळ, झांसी जंक्शन, ग्वालियर जंक्शन, आग्रा आणि दिल्ली या स्थानकांवर थांबण्याची शक्यता रेल्वे अधिकाऱ्यांनी वर्तवली आहे.