घरगुती गॅसच्या व्यावसायिक वापराविरोधात मोहीम

विधानसभेत अन्न व नागरी पुरवठा मंत्री गिरीश बापट यांची माहिती

म. टा. विशेष प्रतिनिधी, मुंबई

घरगुती गॅसच्या व्यावसायिक वापराच्या विरोधात राज्यभर तपासणी मोहीम हाती घेण्यात येणार असून जिल्हा पुरवठा अधिकाऱ्यांना रेशन दुकान तपासणीसोबतच गॅस एजन्सी तपासणीचे काम देण्यात येणार असल्याचे अन्न व नागरीपुरवठा मंत्री गिरीश बापट यांनी बुधवारी विधानसभेत प्रश्नोत्तराच्या तासात सांगितले.

आमदार वीरेंद्र जगताप यांनी यासंदर्भात प्रश्न उपस्थित केला होता. त्याला उत्तर देताना बापट म्हणाले की, जिल्हा पुरवठा अधिकाऱ्यांमार्फत जीवनावश्यक वस्तू अधिनियम अंतर्गत गॅस एजन्सी तपासणीचे काम सुरू आहे. पुरवठा अधिकाऱ्यांकडून स्वस्त धान्य दुकांनाची तपासणी केली जाते. आता त्यांना नव्याने गॅस एजन्सी तपासणीचे काम देण्यात येईल. गॅस कंपन्यांच्या अधिकाऱ्यांना सोबत घेऊन ही कारवाई करण्यात येईल. यावेळी झालेल्या चर्चेत सदस्य सुभाष साबणे यांनी भाग घेतला.