क्रिकेटपटूनं घुसवली रेल्वे स्थानकात कार

मटा ऑनलाइन वृत्त । मुंबई

मुंबईतील पश्चिम रेल्वे मार्गावरील गर्दीनं ओसंडून वाहणाऱ्या अंधेरी स्थानकाच्या प्लॅटफॉर्मवर आज सकाळी अचानक एक कार घुसल्यानं प्रवाशांच्या काळजाचा ठोका चुकला. कार चालकानं वेळीच नियंत्रण मिळवल्यानं मोठा अपघात टळला. या प्रकरणी पोलिसांनी २५ वर्षीय रणजीपटू हरमीत सिंगला ताब्यात घेतलं असून त्याची चौकशी सुरू आहे.

सकाळी सात वाजण्याच्या सुमारास हा विचित्र प्रकार घडला. सकाळची वेळ असल्यामुळे प्लॅटफॉर्मवर प्रवाशांची गर्दी होती. त्याच वेळी अंधेरी स्थानकातील प्लॅटफॉर्म क्रमांक एकवर कार आल्याने प्रवासी घाबरले. ड्रायव्हिंग सीटवर बसलेल्या हरमीतनं वेळीच कारवर नियंत्रण मिळवल्याने पुढील अनर्थ टळला.

हरमीत सिंग हा रणजी क्रिकेटपटू असून भारतीय क्रिकेट संघाच्या १९ वर्षाखालील संघातून तो खेळला आहे. सध्या पोलीस त्याची चौकशी करत असून त्याची वैद्यकीय चाचणीदेखील करण्यात येणार आहे. 'रस्ता चुकल्यामुळे आपण प्लॅटफॉर्मवर आलो,' असा दावा हरमीतने केला आहे. प्लॅटफॉर्मवर गाडी घुसवल्याबद्दल हरमीतवर गुन्हा नोंदवण्यात आला आहे.

मागील वर्षीही अंधेरीतील याच प्लॅटफॉर्मवर असाच प्रकार घडला होता.