अंधेरी उड्डाणपुलावर कारला आग

मटा ऑनलाइन वृत्त । मुंबई

पश्चिम द्रुतगती महामार्गावरील अंधेरी उड्डाणपुलावर आज दुपारी १२च्या सुमारास एका कारनं अचानक पेट घेतला. हा भडका इतका भीषण होता की, काही मिनिटांतच कार जळून खाक झाली. या दुर्घटनेमुळे जोगेश्वरीकडे जाणारी वाहतूक थांबवण्यात आल्यानं महामार्गावर मोठी वाहतूक कोंडी झाली होती.

मुंबई मेट्रोवरील पश्चिम द्रुतगती महामार्ग स्थानकाच्या खालून अंधेरीचा उड्डाणपूल जातो. तिथेच ही दुर्घटना घडली. या घटनेची माहिती तातडीने अग्निशमन दलाला कळवण्यात आली, त्यांचे बंब लगेच रवानाही झाले, पण तोपर्यंत कार आगीचं भक्ष्य झाली होती. अग्निशमन दलानं आगीवर नियंत्रण मिळवल्यानंतर वाहतूक धीम्या गतीने सुरू झाली.

कारला आग नेमकी कशामुळे लागली, हे कळू शकलेलं नाही.