२०१८ पासून सीबीएसईची पुन्हा बोर्डाची परीक्षा

मटा ऑनलाइन वृत्त । नवी दिल्ली

केंद्रीय माध्यमिक शिक्षा मंडळ म्हणजेच सीबीएसई बोर्ड २०१८ पासून दहावीची बोर्ड परीक्षा पुन्हा सुरू करण्याच्या तयारीत आहे. यासंबंधीची घोषणा केंद्रीय मनुष्यबळ विकासमंत्री प्रकाश जावडेकर येत्या २५ ऑक्टोबरला करण्याची शक्यता आहे. मनुष्यबळ विकासमंत्रीपदाचा कारभार हाती घेतल्यानंतरचा जावडेकरांचा हा पहिलाच मोठा निर्णय असेल.

सध्या सीबीएसई दहावीच्या विद्यार्थ्यांना बोर्डाची किंवा शालांतर्गत अशा दोन पर्यायांपैकी एक ऐच्छिक पर्याय निवडण्याची मुभा आहे. या निर्णयासोबतच, 'नो डिटेंशन पॉलिसी' पाचवीपर्यंत करण्याचा निर्णयही यावेळी जाहिर करण्यात येणार आहे. शिक्षण हक्क कायद्यांतर्गत सध्या आठवीपर्यंत कोणालाही नापास न करण्याचं धोरण आहे. ते पाचवीपर्यंत करण्यात येईल. अर्थात आठवीपर्यंत अनुत्तीर्ण होणाऱ्या विद्यार्थ्यांना पुन्हा परीक्षा देण्याची संधी देणे राज्यांना बंधनकारक आहे.

राज्यात परिणाम नाही

सीबीएसई दहावीची शालांतर्गत परीक्षा देणाऱ्या विद्यार्थ्यांचे प्रमाण महाराष्ट्रात अत्यल्प आहे. त्यामुळे या निर्णयाचा फारसा परिणाम राज्यातल्या सीबीएसईच्या विद्यार्थ्यांवर होणार नाही. यावर्षी झालेली २०१६ ची सीबीएसई दहावी बोर्डाची परीक्षा ४०,८७२ विद्यार्थ्यांनी दिली होती, तर केवळ २,५९५ विद्यार्थ्यांनी शालांतर्गत परीक्षेचा पर्याय निवडला होता.