मुंबईत आता अंत्यसंस्काराची वेळ ऑनलाइन मिळणार

म. टा. विशेष प्रतिनिधी, मुंबई: मुंबईतील स्मशानभूमींची सद्यस्थिती कळावी, यासाठी महापालिका संगणकीय 'डॅशबोर्ड' विकसित करत असून त्याचे काम अंतिम टप्प्यात आहे. या महिन्याच्या अखेरीस तो कार्यान्वित होणार आहे. स्मशानभूमींच्या सद्यस्थितीची ही माहिती पालिकेच्या १९१६ या हेल्पलाइनशी संलग्न केली जाणार आहे. कुठल्या स्मशानभूमीत किती अंत्यसंस्कार सुरू असून, पुढील अंत्यसंस्काराची वेळ ऑनलाइन मिळणार आहे.

करोनाबाधितांच्या वाढत्या मृत्यूमुळे मुंबईतील विविध भागांतील स्मशानभूमींवर ताण येत असून, मृतांच्या नातेवाईकांना अंत्यसंस्कारासाठी चार ते सहा तास ताटकळत राहावे लागत आहे. यासाठी हा 'डॅशबोर्ड' बनवला जात आहे. विद्युत वा गॅस दाहिनींमध्ये एका मृतदेहावर अंत्यसंस्कार केल्यानंतर ही यंत्रणा काही कालावधीसाठी बंद ठेवली जाते. तर कधी देखभाल व दुरुस्ती करण्यासाठी बंद ठेवावी लागते. या सर्व बाबी लक्षात घेता एका विद्युत वा गॅस दाहिनींमध्ये २४ तासात आठ मृतदेहांवर अंत्यसंस्कार होऊ शकतात. या प्रकारची १८ चितास्थाने पालिका क्षेत्रात असून, त्यात २४ तासांत १४४ मृतदेहांवर अंत्यसंस्कार करता येतात.

पारंपरिक पद्धतीनुसार जळाऊ लाकूड वापरून अंत्यसंस्कार करण्यासाठी मुंबईत २१९ चितास्थाने आहेत. या प्रत्येक चितास्थानाची कमाल क्षमता २४ तासांत सहा मृतदेहांवर अंत्यसंस्कार करण्याची आहे, तर २१९ चितास्थानांची एकत्रित क्षमता ही २४ तासांत एक हजार ३१४ मृतदेहांवर अत्यंसंस्कार करण्याची आहे. करोनाच्या पार्श्वभूमीवर स्मशानभूमींवर ताण येत असल्याने मृतांच्या नातेवाईकांना वस्तूस्थिती कळावी यासाठी ही माहिती पालिकेच्या वतीने देण्यात आली आहे.

मुंबईतील स्मशानभूमींची स्थिती

- पारंपरिक, विद्युत, गॅसदाहिनी असलेल्या स्मशानभूमी : ४६

- चितास्थाने : २३७

- विद्युत वा गॅसदाहिनी : ११, त्यात शवदाहिनी : १८

- स्मशानभूमींची कमाल क्षमता २४ तासात १ हजार ४५८ मृतदेहांवर अंत्यसंस्कार