म. टा. प्रतिनिधी, मुंबई
गणेशोत्सवात लोकलच्या विलंबयातनेने त्रस्त असणाऱ्या मुंबईकरांना पुन्हा एकदा रेल्वेच्या खोळंब्यामुळे मनस्ताप सहन करावा लागला. शुक्रवारी एकाच दिवशी ठाणे स्थानक परिसरात दोन वेळा रेल्वे रुळांना तडा गेल्यामुळे मध्य रेल्वेची धीम्या आणि जलद मार्गावरील लोकल फेऱ्या दिवसभर सुमारे २० ते २५ मिनिटे उशिराने धावत होत्या.
ठाणे ते मुलुंड स्थानकादरम्यान अप धीम्या मार्गावर सकाळी पावणे दहा वाजण्याच्या सुमारास रेल्वेरुळाला तडा गेला. सकाळी गर्दीच्या वेळेस हा बिघाड उद्भवल्यामुळे मध्य रेल्वेने तातडीने दुरुस्ती पथकाला पाचारण करत दुरुस्ती काम हाती घेतले. दहा वाजण्याच्या सुमारास रूळ वाहतुकीसाठी खुला करण्यात आला. मात्र सकाळी गर्दीच्या वेळी हा बिघाड झाल्यामुळे लोकल फेऱ्या सुमारे १५ ते २० मिनिटे विलंबाने धावत होत्या.
या बिघाडामुळे अप मार्गावरील लोकल विलंबाने धावत असतानाच ठाणे स्थानक परिसरातच डाऊन जलद मार्गावरील रुळाला तडा गेल्याचे समोर आले. या तड्यांमुळे दु. १२.१० ते दु. १२.३० या काळात डाऊन जलद मार्गावरील लोकल वाहतूक बंद होती. या बिघाडामुळे ट्रेन क्रमांक ११०८३ लोकमान्य टिळक टर्मिनस-काजीपेट ताडोबा एक्स्प्रेस खोळंबली होती. या दोन्ही घटनांमुळे शुक्रवारी सकाळी आणि दुपारच्या सत्रातील लोकल फेऱ्या सुमारे २० ते २५ मिनिटे विलंबाने धावत होत्या.
.............................