म. टा. विशेष प्रतिनिधी, मुंबई
सरकारी-खाजगी कार्यालये तसेच उद्योग व्यवसायांचे नवे केंद्र म्हणून झपाट्याने विकसित झालेल्या वांद्रे कुर्ला कॉम्प्लेक्सवरील( बीकेसी) भार दिवसेंदिवस वाढत असून भविष्यात बुलेट ट्रेन, मेट्रो प्रकल्प तसेच आंतरराष्ट्रीय वित्तीय केंद्रामुळे बीकेसीला सक्षम पायाभूत सुविधांची गरज निर्माण होणार आहे. जवळपास आठ सिग्नल असणाऱ्या बीकेसीतील अंतर्गत रस्त्यांवरील वाहतूककोंडी दूर करण्यासाठी रस्ते सिग्नल विरहित करण्याच्या दृष्टीने विचार सुरू आहे. सिग्नल विरहित यंत्रणा विकसित करण्यासाठी अनेक फेरबदल करावे लागतील.
बीकेसीत रोज ५० हजार वाहने ये-जा करतात. किमान दोन लाख लोक व्यवसाय वा नोकरीनिमित्त येथे येतात. खासगी तसेच सरकारी कार्यालयांची संख्या वाढत असल्याने हा आकडा आणखी वाढणार आहे. पश्चिम व पूर्व उपनगरासाठी बीकेसी हे अत्यंत मध्यवर्ती ठिकाण आहे. पूर्व उपनगरातून कुर्ला तर पश्चिम उपनगरातून वांद्रे येथून बीकेसीत येणे सोपे जाते. दक्षिण मुंबईतून अनके खासगी तसेच सरकारी कार्यालयांचे मागील काही वर्षांत स्थलांतर झाल्याने बीकेसीचा पसारा वाढला आहे. साहजिकच पार्किंग व वाहतूककोंडीसारखे प्रश्न भेडसावू लागले आहेत. बीकेसीत येणे अधिक सोपे जावे याकरिता एमएमआरडीएने उड्डाणपुलांसारखे काही प्रकल्प हाती घेतले आहेत. त्यामुळे बीकेसीतील वर्दळ आणखी वाढणार आहे.
आगामी काळात बीकेसीत बुलेट ट्रेनचे स्थानक उभे राहणार आहे. त्याचबरोबर मेट्रोचे काही मार्गही याच भागातून जाणार आहेत. त्याशिवाय आंतरराष्ट्रीय वित्तीय केंद्रही उभारले जात आहेत. जिओ मोबाइलचे कन्व्हेन्शन सेंटरही येथेच आहे. त्यामुळे येत्या काही वर्षांत बीकेसीत येणाऱ्यांची संख्या सध्याच्या तिप्पट होण्याची शक्यता आहे. त्या पार्श्वभूमीवर अंतर्गत रस्ते, सिग्नल यंत्रणा, पार्किंग व्यवस्था आणखी सक्षम करण्याची गरज निर्माण झाली आहे. त्यादृष्टीने नेमके काय करता येईल याचा अभ्यास एमएम्आरडीए करत आहे.
० सिग्नल यंत्रणा
सध्या बीकेसी टेलिफोन एक्सचेंज ते कौटुंबिक न्यायालय या पट्ट्यात आठ सिग्नल आहेत. बीकेसीत येण्याच्या पहिल्या टप्प्यात म्हणजे एलबीएस कुर्ला सिग्नल व चेंबूर सांताक्रूझ लिंक रोडच्या दिशेने वाहतुकीची अभूतपूर्व कोंडी होते. परिणामी सायंकाळच्या वेळेस बीकेसीतून कुर्ला स्थानक किंवा लिंक रोडमार्गे पूर्व द्रुतगती महामार्ग गाठणे खूपच वेळखाऊ होते. त्यामुळे किमान बीकेसीतील अंतर्गत रस्ते तरी सिग्नल विरहित होण्याची आवश्यकता आहे, असे तज्ज्ञांचे मत आहे. मात्र हे सिग्नल काढल्यानंतर ज्या ठिकाणी बॉटल नेक तयार होईल, तेथेही पर्यायी व्यवस्था करावी लागणार आहे.