झोपड्यांवरील कारवाईला आव्हान

पुनर्वसनासाठी कार्यवाही होत नसल्याचा आरोप

म. टा. विशेष प्रतिनिधी, मुंबई

चांदिवली विधानसभा क्षेत्रातील जलवाहिन्यांलगतच्या झोपड्यांवर कारवाईची मोहीम राबवताना मुंबई महापालिकेकडून झोपडीधारकांच्या पुनर्वसनासाठी योग्य ती कार्यवाही केली जात नसल्याचा आरोप करत या कारवाईला विरोध करणारी याचिका काँग्रेसचे माजी मंत्री व नेते नसीम खान यांनी मुंबई उच्च न्यायालयात केली आहे. याविषयी आज, बुधवारी न्या. अभय ओक व न्या. ए. के. मेनन यांच्या नेतृत्वाखालील खंडपीठासमोर प्राथमिक सुनावणी होण्याची शक्यता आहे.

मुंबईतील नागरिकांच्या सुरक्षिततेच्या दृटीने जनहित मंचने केलेल्या जनहित याचिकेवर उच्च न्यायालयाने जलवाहिन्यांलगतच्या झोपड्यांवर कारवाईचा आदेश दिला होता. ती कारवाई अद्यापही पूर्ण झाली नसल्याने महापालिकेने मोहिमांचा सपाटा लावला आहे. या पार्श्वभूमीवर खान यांनी चांदिवली विधानसभा क्षेत्रातील आंबेडकरनगर, उदयनगर, मिलिंदनगर या भागांतील झोपड्यांविषयी याचिका केली आहे. ‘या भागांतील झोपडपट्ट्यांमध्ये जवळपास दोन हजार सहाशे कुटुंबे राहत असून त्यांची दोन ते तीन कि.मी. अंतरावरील परिसरात स्थलांतर होण्याची तयारी आहे. मात्र, पालिका त्यांना तब्बल २५ कि. मी. अंतरावरील माहुल परिसरातील घरे देऊ करत आहे. त्याऐवजी त्यांना कुर्लामधील एचडीआयएलच्या इमारतींमधील विमानतळ प्रकल्प बाधितांसाठी बांधलेली घरे देण्यात यावीत. विमानतळ प्रकल्पबाधितांसाठी सुमारे १७ हजार घरे बांधण्यात आलेली असून त्यातील अनेक घरे रिक्त राहणार आहेत. त्यामुळे ती घरे या झोपडीधारकांसाठी दिली जाऊ शकतात’, असे म्हणणे खान यांनी याचिकेत मांडले आहे.