वयोमर्यादेला आव्हान!

‘एलएलबी’बाबत बीसीआयला उत्तर देण्याचे निर्देश
म. टा. खास प्रतिनिधी, मुंबई
‘एलएलबी’च्या अभ्यासक्रमाला प्रवेश घेण्यासाठी बार कौन्सिल ऑफ इंडियाने (बीसीआय) घातलेल्या वयोमर्यादेला उच्च न्यायालयात आव्हान देण्यात आले आहे. त्याविषयी न्यायालयाने ‘बीसीआय’कडे चार आठवड्यांत उत्तर मागितले आहे.
व्यवसायाने वकील व प्राध्यापक असलेल्या यास्मिन तवारिया यांनी ही जनहित याचिका केली आहे. त्यावर शुक्रवारी मुख्य न्यायमूर्ती मंजुला चेल्लुर व न्या. एम. एस. सोनक यांच्या खंडपीठापुढे प्राथमिक सुनावणी झाली. याचिकेनुसार, ‘बीसीआय’ने जे नवे नियम केले आहेत, त्याप्रमाणे २० वर्षांहून अधिक वयाची व्यक्ती ‘एलएलबी’च्या पाच वर्षांच्या अभ्यासक्रमाला तर ३० पेक्षा अधिक वयाची व्यक्ती तीन वर्षांच्या अभ्यासक्रमाला प्रवेश घेऊ शकणार नाहीत. एखाद्याला काही कारणास्तव सुरुवातीला हा अभ्यास करता आला नाही, याचा अर्थ त्याला नंतर संधीच मिळू नये, हे चुकीचे आहे. वयाचे बंधन घालून ‘बीसीआय’ नागरिकांना शिक्षण घेण्याच्या हक्कापासून वंचित ठेवत आहे, असे म्हणणे यास्मिन यांनी मांडले आहे. त्यांनी याप्रश्नी अंतरिम आदेश देण्याची विनंती खंडपीठाला केली. मात्र, सध्या असा काही आदेश देण्यास नकार देत खंडपीठाने ‘बीसीआय’ला उत्तर दाखल करण्यास सांगितले.