सिनेट निवडणूक वेळापत्रकात बदल करा

विद्यार्थी संघटनांची मागणी

म. टा. प्रतिनिधी, मुंबई

गेल्या अनेक दिवसांपासून सर्वांचे लक्ष लागून राहिलेल्या मुंबई विद्यापीठाच्या सिनेट निवडणुकीची घोषणा मंगळवारी करण्यात आली खरी, मात्र महाविद्यालयीन सुट्टीच्या काळात ही सर्व प्रक्रिया जाहीर केल्याने त्याचा फटका विद्यार्थी संघटनांना बसणार आहे. त्यामुळे या वेळापत्रकात बदल करण्याची मागणी विद्यार्थी संघटनांकडून करण्यात आली आहे. यासंदर्भात बुधवारी काही संघटनांनी कुलगुरू डॉ. संजय देशमुख यांच्याकडे निवेदन दिले असून याप्रकरणी विद्यापीठ काय भूमिका घेते, याकडे लक्ष लागले आहे.

मुंबई विद्यापीठातील विविध प्राधिकरणांच्या निवडणुकीची जोरदार तयारी सुरुवात झाली असून यासाठी विशेष समितीही नेमण्यात आली आहे. मात्र सिनेट नोंदणीकृत पदवीधर निवडणूक प्रक्रियेसाठी लागणाऱ्या कालावधीचा विचार करता, निवडणुकांचा शेवटचा टप्पा ऐन गणेशोत्सवात येण्याची शक्यता आहे. त्याचा फटका विद्यार्थी संघटनांना बसण्याची शक्यता आहे. त्यामुळे या प्रक्रियेत बदल करण्याची मागणी युवा सेनेने केली आहे. या मागणीचे निवेदन युवा सेनेच्या माजी सिनेट सदस्यांनी कुलगुरू डॉ. संजय देशमुख यांच्याकडे दिल्याची माहिती प्रदीप सावंत यांनी दिली. या निवडणुकांमधील मतदार, उमेदवार हे मुंबई, कोकणातील असल्याने सणाच्या वातावरणामुळे त्यांची गैरसोय होण्याची भीती त्यांनी व्यक्त केली आहे.

विद्यापीठाने या निवडणुकीची प्रक्रिया जाहीर केले असली, तरी त्यातील बहुतांश भाग या सुट्टीच्या काळात होणार असल्याचे दिसून आले आहे. त्यामुळे अनेक माजी विद्यार्थ्यांशी संपर्क साधणे कठीण होणार आहे. त्यामुळे या वेळापत्रकामध्ये बदल करण्याची मागणी मनसेचे माजी सिनेट सदस्य सुधाकर तांबोळी यांनी केली. लवकरच यासंदर्भात कुलगुरूंची भेट घेणार असल्याचे त्यांनी सांगितले.