गणेश आगमनामुळे वाहतूक मार्गांत बदल

परळ, दादर येथील मार्ग आज काही काळासाठी बंद

म. टा. प्रतिनिधी, मुंबई

मुंबईत शनिवारी अनेक प्रमुख सार्वजनिक मंडळांच्या गणेशमूर्तींचे आगमन होणार आहे. या आगमन सोहळ्यादरम्यान भाविकांची गर्दी होत असल्याने दरवर्षी कोंडी होते. त्यामुळेच शनिवारी सकाळपासूनच परळ, लालबाग, दादर या भागांतील विशिष्ट मार्ग हे काही तासांसाठी बंद ठेवण्यात येणार असून तेथील वाहतूक पर्यायी मार्गांवरून वळविण्यात येणार आहे.

शनिवारी सकाळी १० पासूनच परळच्या सेंट्रल मैदान येथील दिवंगत प्रसिद्ध मूर्तिकार विजय खातू यांच्या कारखान्यातून चिंचपोकळीचा चिंतामणी, डोंगरीचा राजा, फोर्टचा राजा, खेतवाडी ११वी गल्ली, मुंबईचा महाराजा आदी मंडळांच्या मूर्ती मंडपाच्या दिशेने प्रस्थान ठेवणार आहेत. या मिरवणुकीदरम्यान परळ, लालबाग, दादर परिसरात प्रचंड गर्दी होणार असल्याने मोठ्या प्रमाणात वाहतुकीचा खोळंबा होण्याची शक्यता आहे. त्यामुळे गणेशमूर्तींच्या आगमनाचे मार्ग बंद करून पर्यायी मार्गाने वाहतूक वळविण्यात येणार आहे. यावेळी चोख पोलिस बंदोबस्तही ठेवण्यात येणार आहे. या भागातील वाहतूक सुरळीत ठेवण्यासाठी भोईवाडा आणि भायखळा वाहतूक विभागाचे ५० पोलिस कर्मचारी तैनात असतील. तर, शंभरहून अधिक पोलिस मिरवणुकीतील गर्दी नियंत्रणात ठेवणार आहेत.

...

मिरवणुकीदरम्यान वाहतूककोंडी होऊ नये यासाठी नियोजन करण्यात आले आहे. येथील वाहतूक पर्यायी मार्गांवरून वळवण्यात येणार असून ५० वाहतूक पोलिस येथील वाहतूक नियंत्रणात ठेवतील.

- अमितेश कुमार, सह पोलिस आयुक्त (वाहतूक विभाग)