छगन भुजबळ जेजे रुग्णालयात, प्रकृती स्थिर

मुंबई: मनी लॉण्ड्रिंग प्रकरणी तुरुंगात असलेले माजी सार्वजनिक बांधकाम मंत्री छगन भुजबळ यांना पुन्हा एकदा जे. जे. रुग्णालयात दाखल करण्यात आलंय. पोटदुखी आणि दम्याचा त्रास जाणवू लागल्याने त्यांना जेजेत सीसीयूमध्ये ठेवण्यात आलं असून त्यांची प्रकृती स्थिर असल्याचं त्यांच्यावर उपचार करणाऱ्या डॉक्टरांनी सांगितलं.

छगन भुजबळ यांना शनिवारी पोटदुखी, मधुमेह आणि दम्याचा त्रास जाणवू लागला. त्यामुळे त्यांना तात्काळ आर्थर रोड तुरुंगातून जेजे रुग्णालयात हलविण्यात आले. जेजेत आधी त्यांना आयसीयूत दाखल करण्यात आले होते. परंतु त्यांची प्रकृती नाजूक असल्यानं त्यांना सीसीयूत हलविण्यात आलं. आता त्यांची प्रकृती सुधारत असल्याचं वैद्यकीय सूत्रांनी सांगितलं. भुजबळांना अन्ननलिका आणि आतड्यांचाही आजार असल्याचं सांगण्यात आलं. प्रकृती बिघडत असल्याने मागच्या वर्षी भुजबळ यांना ३५ पेक्षा जास्त वेळा बॉम्बे हॉस्पिटलमध्ये दाखल करण्यात आलं होतं.