आता अंड्यांपाठोपाठ चिकनही महागणार

मटा ऑनलाइन वृत्त । मुंबई

भाजीपाल्याच्या दरांनी तोंड पोळलेले असतानाच आता नॉनव्हेज खाणाऱ्यांचेही तोंड पोळणार आहे. अंड्यांपाठोपाठ आता चिकनचे भावही वाढणार असल्याने चिकन खाणाऱ्यांच्या खिशाला झळ पोहचणार आहे.

वेंकीज इंडिया लिमिटेडचे संचालक व्यंकटेश राव यांनी चिकनचे दर वाढणार असल्याचे संकेत दिले आहेत. मात्र किती दर वाढणार हे त्यांनी स्पष्ट केलं नाही. सध्या अंडी उत्पादकांना प्रचंड नुकसान सहन करावं लागतंय. विशेष म्हणजे अंड्यांचे दर वाढल्याने कुक्कुट पालन करणाऱ्या गरीब शेतकऱ्यांनाही पहिल्यांदाच पैसा मिळू लागला आहे. मुळात मुंबईत ग्रामीण भागातून चिकन येतं. मुंबईत दहा लाखाचं चिकन घेतलं जात असेल आणि ते १५ लाखावर नेले तर चिकनचे दर आपोआप कोसळतील. पण तसे होताना दिसत नसल्याचं व्यंकटेश राव यांनी सांगितलं.

'हिवाळ्यात चिकनला खूप मागणी असते. त्यातच मका आणि सोया या कोंबड्यांच्या खाद्याची ७५ टक्के उपलब्धता असल्याने कुक्कुट पालन करणारे शेतकरी, व्यापारी आणि उद्योजक एकत्र येऊन चिकनचे दर पुन्हा वाढवतील, असं वाटतं,' असंही त्यांनी सांगितलं. 'गेल्या तीन-चार वर्षातील आकडेवारी पाहता कोंबड्यासाठी लागणाऱ्या कच्च्या मालाच्या उपलब्धेतवरच चिकन आणि अंड्याचे भाव अवलंबून राहिले आहेत. गेल्या नऊ महिन्यातील आकडेवारी पाहता चिकनचे दर स्थिर आहेत. पण महाराष्ट्राचा विचार करता महाराष्ट्रात चिकनचे दर कोसळलेले दिसतात,' असंही त्यांनी निदर्शनास आणून दिलं.