व्हिप मोडणाऱ्या १४ आमदारांना शिंदे गटाकडून नोटीस; फक्त एकाला वगळलं, कारणही सांगितलं

मुंबई: विधानसभेत विश्वासदर्शक ठरावावेळी विरोधात मतदान करणाऱ्या शिवसेनेच्या १४ आमदारांना शिंदे गटाकडून नोटीस बजावण्यात आली आहे. शिवसेनेच्या एकूण १५ आमदारांनी विश्वासदर्शक ठरावाच्या विरोधात मतदान केलं. मात्र शिंदे गटाकडून १४ जणांना नोटीस बजावण्यात आली आहे. आज विधिमंडळात शिंदे सरकारकडून विश्वासदर्शक ठराव मांडण्यात आला. या ठरावाच्या बाजूनं १६४ जणांनी मतदान केल्यानं सरकारनं बहुमत सिद्ध केलं. ९९ सदस्यांनी प्रस्तावाच्या विरोधात मतदान केलं. त्यात सेनेच्या १५ आमदारांचा समावेश होता.


व्हिपचं उल्लंघन केल्याप्रकरणी १४ आमदारांना नोटीस देण्यात आल्याची माहिती शिंदे गटाचे प्रतोद भरत गोगावले यांनी दिली. आम्ही आदित्य ठाकरेंना नोटीस दिलेली नाही. बाळासाहेब ठाकरेंचा आम्ही आदर करतो. त्यामुळेच आदित्य ठाकरेंना नोटीस बजावण्यात आलेली नाही, असं गोगावलेंनी सांगितलं. आदित्य ठाकरेंचं नाव अपात्र ठरवण्यासाठी देण्यात आलेलं नाही. बाळासाहेब ठाकरे यांच्याबद्दल असलेला आदर हे त्यामागचं कारण आहे, असं गोगावले म्हणाले.

विश्वासदर्शक ठरावाच्या बाजूनं मतदान करावं, यासाठी भरत गोगावलेंनी शिवसेनेच्या सर्व ५५ आमदारांना व्हिप बजावला होता. शिंदे गटात असलेल्या ४० आमदारांनी ठरावाच्या बाजूनं मतदान केलं. मात्र शिवसेनेच्या १५ आमदारांनी ठरावाच्या विरोधात मत दिलं. त्यामुळे शिंदे गटानं त्यांच्याविरोधात कायदेशीर कार्यवाही सुरू केली आहे. त्याचाच भाग म्हणून व्हिपचं उल्लंघन करणाऱ्यांना नोटीस बजावण्यात आली आहे.