मुंबई विद्यापीठात चिनी भाषेचे धडे

म. टा. प्रतिनिधी, मुंबई

मुंबई विद्यापीठात पुढील वर्षीपासून ‘बी. ए. इन चायनीज’ अभ्यासक्रम सुरू करण्यात येणार आहे. कुलगुरू डॉ. संजय देशमुख यांनी एका कार्यक्रमात याची घोषणा केली. या अभ्यासक्रमामुळे करिअरच्या अनेक संधी उपलब्ध होणार आहेत.

आधुनिक युगात परदेशी भाषांच्या क्षेत्रात करिअरच्या हजारो संधी निर्माण झाल्या आहेत. या पार्श्वभूमीवर मुंबई विद्यापीठानेही विद्यार्थ्यांना चिनी भाषेचे धडे देऊन रोजगाराच्या संधी निर्माण करून देण्याचा निर्णय घेतला असल्याचे कुलगुरू डॉ. संजय देशमुख यांनी सांगितले. जागतिक ‘कॉनफ्युशियस डे’निमित्त शनिवारी मुंबई विद्यापीठाच्या चर्चगेट कॅम्पस येथे आयोजित कार्यक्रमात त्यांनी वरील घोषणा केली. चीनचे मुंबईतील उच्चायुक्तही उपस्थित होते.