एमटीडिसी : स्वच्छता ही सेवा कॅम्पेन चे आयोजन

मटा ऑनलाइन वृत्त । मुंबई

महाराष्ट्र पर्यटन विकास महामंडळातर्फे केंद्रीय पर्यटन खात्याच्या साहाय्याने 'स्वच्छता ही सेवा कॅम्पेन'चे आयोजन करण्यात आले होते. पंतप्रधान नरेंद्र मोदी यांच्या पुढाकाराने सुरु करण्यात आलेल्या स्वच्छता अभियानाचा भाग म्हणून जुहू चौपाटी स्वच्छ करण्यासाठी हे कॅम्पेन राबविण्यात येत आहे. केंद्रीय पर्यटन खात्यातील मान्यवर, एमटीडीसीचे अधिकारी आणि प्रसिद्ध भोजपुरी अभिनेता रवी किशन यांचे या कॅम्पेनला सहकार्य लाभले आहे.

पर्यटक, भाविक, कलाकार, साहसप्रेमी आणि व्यावसायिकांसाठी महाराष्ट्र हे भारतातील एक सर्वात आवडते पर्यटनाचे ठिकाण आहे. मुंबई सुंदर आणि स्वच्छ दिसावी यासाठी 'स्वच्छता ही सेवा कॅम्पेन'चे महत्त्व असून हे कॅम्पेन म्हणजे पर्यटन सुधारण्याच्या दृष्टीने टाकलेले ते एक छोटेसे पाऊल आहे. या वेळी महाराष्ट्राचे पर्यटन मंत्री जयकुमार रावल म्हणाले, "आम्ही राष्ट्रपातळीवर बदल घडवून आणण्यासाठी प्रयत्नशील आहोत आणि राज्य व देश स्वच्छ करण्याचे आमचे उद्दिष्ट साध्य करण्यासाठी या कामाशी संबंधित सर्व घटक आग्रहीपणे काम करत आहेत. हा आपला देश आहे आणि या देशाचे एक नागरिक म्हणून त्याची काळजी घेण्यासाठी आपण वैयक्तिक पातळीवर खारीचा वाटा उचलणे आवश्यक आहे. या उपक्रमाला प्रोत्साहन देणे आमचे उद्दिष्ट आहे आणि स्वच्छतेसाठी वागणुकीत बदल करण्याची जाणीव देशाला करून देण्याच्या आमच्या मोहिमेत आम्ही यशस्वी होऊ, अशी आम्ही खात्री देतो."