पदवीधर तरुणांसाठी ‘मुख्यमंत्री फेलोशिप’

सरकारी सेवेत ११ महिने कामाची संधी

म. टा. विशेष प्रतिनिधी, मुंबई

राज्यातील पदवीधर तरुणांना राज्याच्या प्रशासनाचा अनुभव यावा, विविध योजनांची माहिती व्हावी, यासाठी मुख्यमंत्री देवेंद्र फडणवीस यांनी ‘मुख्यमंत्री फेलोशिप’ योजना सुरू केली आहे. या अंतर्गत तरुणांना ११ महिन्यांसाठी राज्याच्या प्रशासनात काम करण्याची संधी मिळणार असून, दरमहा ३५ हजार रुपये छात्रवृत्ती, तर पाच हजार रुपये प्रवास भत्ता देण्यात येणार आहे.

पदवीधर तरुणांना विकासाची प्रक्रिया तसेच दुष्काळ निवारण आदी विविध स्तरावर काम करण्याची संधी दिली जाणार आहे. कोणत्याही शाखेतील पदवीधर आणि पदवुत्तर शिक्षण किमान ६० टक्के गुण असलेल्या तरुणांना या फेलोशिपसाठी अर्ज करता येईल. नामांकित उपक्रमात एक वर्ष काम केले असेल तर अशा तरुणांना प्राधान्य देण्यात येणार आहे. तसेच संगणकातील ज्ञानही गरजेचे असेल.

या फेलोशिपसाठी ५० तरुणांची निवड करण्यात येईल. त्यासाठी खास परीक्षाही घेण्यात येणार आहे. निवड झाल्यानंतर या तरुणांना यशदा, पुणे येथे प्रशिक्षण देण्यात येईल. या तरुणांच्या पसंतीनुसार त्यांना काम करण्यासाठी तसा विभाग दिला जाणार आहे. तरुणांना फेलोशिपच्या काळात लॅपटॉपही देण्यात येईल.