Vijaydurg Fort 'विजयदुर्गा'च्या बुरुजाची पडझड रोखा; मुख्यमंत्री उद्धव ठाकरेंनी घेतली दखल

मुंबईः एक दुर्गप्रेमी आणि प्रख्यात छायाचित्रकार म्हणून मुख्यमंत्री उद्धव ठाकरे यांची ओळख सगळ्यांनाच ठावूक आहे. अलीकडेच सोशल मीडियावर महाराष्ट्रातील प्रमुख किल्ल्यांपैकी एक असलेल्या विजयदुर्ग किल्ल्याचा बुरुज ढासळत असल्याचे फोटो व्हायरल होत आहेत. इन्स्टाग्रामवरील अशीच एक पोस्ट उद्धव ठाकरेंच्या निदर्शनास आल्यानंतर त्यांनी तातडीने पुरातत्व खात्याला आवश्यक त्या उपाययोजना करण्याचे आदेश दिले आहे. तसंच, सांस्कृतिक कार्य विभागाच्या प्रधान सचिवांना या गोष्टीचा पाठपुरावा करण्याच्या सूचना दिल्या आहेत.



उद्धव ठाकरे यांनी इन्स्टाग्रामवर सिंधुदुर्ग जिल्ह्यातील विजयदुर्ग या जलदुर्गाच्या एका बुरुजाची पडझड झाल्याचं लक्षात आलं. या पोस्टची तात्काळ दखल घेत त्यांनी पुरातत्व खात्याला याबाबत माहिती कळवण्याचे व पडझड रोखण्यासाठी पाठपुरावा करण्याच्या सूचना सांस्कृतिक कार्य विभागाचे प्रधान सचिव यांना त्यांनी सूचना दिल्या आहेत. किल्ल्याची डागडुजी आणि देखभालीसाठी पावले उचलण्यासंदर्भात पाठपुरावा करण्याचे आदेशही देण्यात आले आहेत.

विजयदुर्गच्या पडझडीची वेळेतच दखल घेऊन तातडीने प्रशासनाला सूचना केल्यामुळं राज्यात मुख्यमंत्री उद्धव ठाकरे यांच्या सतर्कतेचं सर्व स्तरांतून कौतुक होत आहे. किल्ले हे महाराष्ट्राचे वैभव आहे. ते जतन करण्यासाठी ठाकरे यांनी घेतलेला पुढाकार यामुळं दुर्गप्रेमींनी समाधान व्यक्त केलंय.