मी बाळासाहेबांच्या हातातील कुंचला बघत बघत मोठा झालोः उद्धव ठाकरे

म. टा. प्रतिनिधी, मुंबई : मुंबई विद्यापीठाचे बाळासाहेब ठाकरे अध्यासन केंद्र, सार्थ प्रतिष्ठान आणि मुंबई न्यूज फोटोग्राफर असोसिएशन यांच्या वतीने आयोजित 'श्रीमान बाळासाहेब ठाकरे : चित्र आणि चरित्र' या विषयावरील छायाचित्र प्रदर्शनाला शनिवारी मुख्यमंत्री उद्धव ठाकरे यांनी भेट दिली. यावेळी त्यांनी बाळासाहेबांच्या आठवणींना उजळा दिला.

'मी बाळासाहेबांच्या हातातील कुंचला बघत बघत मोठा झालो. त्यांच्या या कुंचल्याने अनेकांना फटकारे मारले. दादर येथील छोटेखानी घरात बाळासाहेब ओसरीत ड्राइंग बोर्ड घेऊन बसायचे. कोऱ्या कागदावर फटकारे मारायचे, बघता बघता तो कोरा कागद जिवंत व्हायचा. त्या व्यंगचित्रांनी इतिहास घडला', असे उद्धव म्हणाले.

'जवळपास १९८५ला बाळासाहेबांनी व्यंगचित्र काढणे थांबवले होते. त्यांनी काढलेल्या व्यंगचित्रांचा अमूल्य ठेवा पुस्तकरूपाने पुढे आणण्यासाठी ठिकठिकाणांवरून मार्मिकचे जुने अंक गोळा केले गेले. त्यातील अनेक दुर्मिळ आणि निवडक व्यंगचित्रांचे 'फटकारे' हे पुस्तक तयार झाले', अशी आठवणीही त्यांनी सांगितली.

'बाळासाहेबांना नेहमीच नावीण्याबद्दल कुतूहल असायचे. मी नवीन कॅमेरा घेतला की ते आवर्जून त्यातील नवीन तंत्रज्ञानाबद्दल जाणून घ्यायचे. व्यंगचित्रकार हा उत्तम चित्रकार असलाच पाहिजे, असा त्यांचा आग्रह असायचा. त्यांच्या व्यंगचित्रांतून रेषांचे भाषांतर, त्यांचे स्वभाववैशिष्ट्य व्यक्त व्हायचे', असे उद्धव यांनी नमूद केले. तसेच ज्या-ज्या छायाचित्रकारांनी बाळासाहेबांच्या छायाचित्रांचा हा दुर्मिळ खजिना उपलब्ध करून दिला, त्या सर्वांचे त्यांनी अभिनंदन केले.

मुंबई विद्यापीठाच्या दीक्षांत सभागृहात आयोजित या कार्यक्रमाला रश्मी ठाकरे, खासदार राहुल शेवाळे, विनायक राऊत, राजन विचारे, मुंबई विद्यापीठाचे कुलगुरू प्रा. सुहास पेडणेकर, कुलसचिव सुधीर पुराणिक यांच्यासह विविध प्राधिकरणांतील सदस्य आदी उपस्थित होते. १७ मेपासून भरविण्यात आलेल्या या प्रदर्शनात राज्यातील नामवंत छायाचित्रकारांनी काढलेली बाळासाहेब ठाकरे यांची दुर्मिळ छायाचित्रे प्रदर्शित करण्यात आली होती.